Сумар дня на 8. вересня/септембра 2020 р.

Приносиме вам сумар медияльной ґрупы ЛЕМ.фм+ на ден 8. вересня/септембра 2020 р.

Бєщадска желізниця, істория ци будучніст?

При желізницьовій стациі в Команчы мож уж обзерати експозицию Фонду «Тором Ославы», котра припоминала буде найкрасшы рокы узкоторовой желізниці. Додатково єст то тіж промоция думкы реактивациі желізниці в формі туристичной атракциі. Експозиция складат ся з двох шын та парох підкладів, котры припоминают желізицьовы бічны торы. На зрыхтуваных торах жде дрезина та пару ваґоників з ориґінального табору, котрый хоснуваный был в бєщадскых лісах, жебы звозити ним дерево. В тым тыжни експозицию дополнит інформацийна таблиця – з історийом бєщадской желізниці та новинами і думком реактивациі торовиска. Зрыхтуваня проєкту можливе было завдякы підпорі локальных діячів і Ґміны Команча. Думку підтримал тіж Фонд Бєщадска Лісова Желізниця, котрый удоступнил табір.

Першы штырі муралі Ґрибівскых жытелів уж сут готовы

3. вересня/септембра Стоваришыня «Ґрибівска Саґа» разом з підкарпатскым артистом Аркадиюшом Андрейковом зачали проєкт пт. «Тихій Мемориял – Ґрибівска Саґа». Цілю проєкту єст упамятніня на деревяных стінах ци мурах важных для реґіону осіб, але і простых сцен з жытя місточка і сел, базуючы на старых фотоґрафіях. Єст то тіж думка на оповіджыня спільной істориі так ріжных під взглядом культуры ци реліґіі жытелів Ґрибівскых Гір. Через штырі дни возникли штырі муралі, што представляют ведучого партизантского одділу Францішка Пашка, жыдівску родину та директорку Жіночой Школы. Не єст то іщы конец проєкту. В плянах єст тіж мураль представляючый Фльоринчана Михала Романяка – діяча, котрый ціле своє жытя был звязаный з лемківскыма справами. Брал він участ в творіню ідеі Лемківской Ватры, а з його ініциятивы в 50. річницю Акциі Вісла станула в Михалові капличка, припоминаюча о выгнаню Русинів з рідной землі. Мураль мож буде обзерати на деревяным будинку Романяків во Фльоринці.

Европа по пандеміі: Солідарніст, Свобода, Спільнота?

Днес зачал ся тридньовый Економічный Форум 2020 під гослом «Европа по пандеміі: Солідарніст, Свобода, Спільнота?», котрый того рока не проходит в Креници. Тота циклична подія, головным партнером котрой єст Малопольща, вынятково того рока была перенесена до Карпача. Причыном є максимальна безпека участників форум і часове причысліня новосандецкого повіту до тзв. жолтой зоны. Традицийно на форум стрічат ся головы держав і урядів, міністры, самоурядовці, експерты, науковці та представникы світа культуры і медий. В часі спільных дискусий підняты будут такы темы як розвиток Малопольщы, Малопольскій Антикризисовый Щыт, буде і бесіда о тым, чого нас навчыла пандемія коронавіруса. Участникы подіі постарают ся тіж одповісти на звіданя, яка буде Европа по пандеміі. Подібні як і в попередніх роках переданы будут нагороды Економічного Форум в штырьох катеґориях: Чловек Рока, Фірма Рока, Нова Культура Новой Европы та Позаурядова Орґазнізация.

На ровері по Низкым Бескіді, але на жаль не там

На конец злы інформациі для вшыткых любителів роверовых прогульок по Низкым Бескіді. Маґурскій Нацийональный Парк інформує, же в звязку з веденом модернізацийом і консервацийом од 4. вересня/септембра до 15. жолтня/октобра того рока біциґльовый пут ознакуваный синім кольором з Фолюша через Свіржову Поляну до Святковой Великой буде закрытый.