Сумар дня на 9. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 9. грудня/децембра 2022 р.

Проєкт видоковой вежы в Пулавах на Лемковині доціненый в медженародным конкурсі

Проєкт видоковой вежы на Кычері в Пулавах в коросняньскым повіті (східня Лемковина) доцінили в медженародным конкурсі Graitec Advance Award 2022. Робота авторства Пьотра Біла заняла третє місце в конкурсі для проєктантів в Парижы. Перше і другє місця заняли проєкты з Монако і Італиі. Вежа буде мала 34 м і форму клепсидры, розписувана є на пляні форемного шестикутника. Окрем сходів буде мала в центральній части осмикутный шкланый тунель для вінды, што даст можливіст хоснувати вежу особам з неполносправностями. Довкола тунелю запроєктувано стальовы сходы. Вежа має мати три видоковы кондиґнациі, найвысшыа буде задашена і вкрыта шкляныма тафлями. Актуально Бескідскє Туристичне Товариство «Перелом Вислока», котрого є осередок Kiczeraski в Пулавах, глядат фінансовой підпоры, жебы побудувати вежу. Рахує на самоуряды і унійны фундушы.

Рождественный проґрам в Ренесансовым каштелю в Гуменным

Выгорлятскій Музей в Гуменным зрыхтувал на понедільок 12. грудня/децембра продолжыня свого долгодобного проєкту пн. «Рождество в музею». Подія пройде в просторах ренесансового каштелю і зачне ся о 15.00 год. Музей во спілпрацы з містом Гуменне представлят в рамках сохраніня і розвиваня культурных цінности реґіону календар пн. «Ренесансовый кашель в Гуменным 2023». Презентация буде звязана з презентацийом заміру розвитку міста Гуменне – кандидата на званя Місто культуры 2024. В рамках проґраму пройде і рождественный концерт, якій буде вертал ґу цінностям культурной дідовизны предків як част культурной традициі реґіону Вышнього Земплина. Подіі буде товаришыла выстава найкрасшых календарів Словациі за 2022 рік, рождественных і новорічных почтовых карток. Выстава буде пак доступна для одвиджаючых до кінця січня/януара будчого рока.

Презентация моноґрафіі русиньского скульптора Юрия Ґавулы

20. грудня/децембра в братиславскій кавярні Еміль на дворі Ґалериі міста Братислава (Мірбахів палац) одпрезентуют першу книжкову моноґрафію вызначного скульптора русиньского походжыня Юрия Ґавулы. Презентация той двоязычной словацко-анґлицкой книжкы пн. «Лікуваня скульптурами: Юрий Ґавула і його творчіст про архітектуру» буде повязана з дискусийом, в котрій возмут участ Юрий Ґавула, архітект Індра Мартін і кураторка Владиміра Бунґерова. Публикация є результатом досліджынь сына скульптора – візуального артисты Матєя Ґавулы в спілпрацы з теоретиком штукы Данєльом Ґруньом. В моноґрафіі находят ся і тексты дальшых покликаных фаховців. Книжка представлят творы скульптора на симпозиях і ставбах од Братиславы через Ґалянту по Свидник, недалеко рідного села Чабины.

Статистикы за 2022 Бєщадского Нацийонального Парку

Бєщадскій Нацийональный Парк підсумувал тогорічный туристичный сезон. В літнім періоді Парк одвиділо менше чысло осіб як влони – в тым році было то понад 571 тис. входів, а влони однотували іх о 119 тис. веце. В місячных порівнанях лем квітен і май вказали збільшаючы ся тенденциі, решта місяців зменшаючы. Можливыма причынами такых результатів сут поворот до нормальности по періоді постковідового одреаґуваня, ци страх звязаный з приграничным положыньом Парку. Додатково на туристичну фреквенцию неґативно влинула вересньова дощова хвиля. В комунікаті Парк подякувал вшыткым за дотримуваня принципів звиджаня і купуваня білетів вступу, завдякы чому можут утримувати туристичну інфраструктуру.

Джерело фотоґрафіі: www.advancedesignaward.com