Сумар дня на 9. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 9. грудня/децембра 2024 р.

Одсвяткували сме Ден Русинів Польщы

В минулым тыжни святкували сме наше нацийональне свято – Ден Русинів Польщы, якій припадат на 5. ден грудня/децемба. В тым році центральны святкуваня Дня Русинів Польщы проходили 7. грудня/децембра. Зачали ся они во Фльоринці, перед плебанійом, де в 1918 р. нашы предкы зышли ся на віче, якє дало початок Рускій Народній Республиці Лемків. Дальше, як каждого рока, святкуваня продолжали в Рускій Бурсі в Ґорлицях. В рамках музичного проґраму выступили ансамбль Терочка та Петро Трохановскій при акомпаніяменті Ігоря Трохановского. Ден Русинів Польщы был одзначеный не лем на Лемковині. Каждого рока до спільнотовых упамятнінь Дня Русинів Польщы прилучают ся члены Кружка Стоваришыня Лемків в Любіні. 4. грудня/децембра оддали они чест двом важным особам – бывшым членам Кружка – бл. п. Богданови Ґамбальови і бл. п. Янушови Квоці. Покійны спочывают на любіньскым теметові. Януш Квока (вм. 5.11.2024 р.) каждого рока брал участ в любіньскых святкуванях Дня Русинів Польщы. Ходил з другыма членами на гріб бл. п. Богдана Ґамбаля, вызначного лемківского діяча, єдного з думкодавців спільнотовых святкувань нашого нацийонального свята, основателя радия ЛЕМ.фм, одданого справам Руской Бурсы в Ґорлицях.

Наукова конференция посвячена нацийональным, етнічным і языковым меншынам

Днес в Білымстоку зачынат ся дводньова конференция пн. «Нацийональны, етнічны і языковы меншыны в Польщы на европейскым фоні». Конференция має быти вступом до бесіды о 20-літю уставы о нацийональных і етнічных меншынах та о реґіональным языку з 6. січня/януара 2005 рока. Головным орґанізатором конференциі єст Выділ Медженародных Односин Університету в Білымстоку. В першый ден выповідати будут ся політикы, творці уставы і експерты, на другій ден заплянуваны сут три панелі з бесідами представників меншыновой страны Спільной Комісиі Уряду та Нацийональных і Етнічных Меншын о тым, што устава змінила в функцийонуваню меншын. Конференция буде нажыво трансмітувана на каналі YouTube Університету в Білымстоку.

Стріча промуюча публикацию «Переселили нас мусово. Листы Лемків з років 1947-48»

Днес во Вроцлаві одбуде ся стріча промуюча публикацию «Переселили нас мусово. Листы Лемків з років 1947-48» під редакцийом Юрия Стариньского. Публикация печатана єст в двох томах, выдало єй Стоваришыня Лемківскій Ансамбль Пісні і Танця «Кычера». Стрічу вюл буде проф. др габ. Ростислав Жерелік, присутны на бесіді о книжці будут м.ін. проф. др габ. Григорий Грицюк, др габ. Павел Коробчак і др габ. Малґожата Місяк. Публикация єст незвыклі цінным выдавництвом – то выбір автентичных листів Лемків, в котрых описуют они драматичны подіі звязаны з выганяньом. Становлят свідоцтво выселінь і кривд, якых дознали. По бесіді о книжці одбуде ся концерт ґрупы H’лем folk. Подія пройде в Рефектажы Нацийонального Закладу ім. Оссоліньскых во Вроцлаві, початок о 17.00 год.

«Рождественный вечур» в Музею Русиньской Культуры в Пряшові 

Словацкій Нацийональный Музей – Музей Русиньской Культуры в Пряшові просит на послідню подію в тым році – «Рождественный вечур». Подія одбуде ся в найблизшу пятницю 13. грудня/децембра. Буде то концерт різдвяных коляд в інтерпретациі Хору св. Романа Сладкопівця, якій буде дополненый духовным словом архімандриты Марка Дурлака – протосинкєля Пряшівской Аархієпархіі. Хор творят богословы Грекокатолицкой священьской семінариі блаженного Павла Петра Ґойдича в Пряшові.