Сумар дня на 9. липця/юлия 2021 р.

Приносиме вам сумар медияльной ґрупы ЛЕМ.фм+ на ден 9. липця/юлия 2021 р.

Варштаты традицийного ремесла в Выгорлятскым Музею

В тоту неділю, 11. липця/юлия, рушат музейный вакацийный проєкт пн. «Цикль творчых варштатів традицийного ремесла для соспільства – Ожывлены ремесла ІІ», якій і того рока буде проходил в скансені Выгорлятского Музею в Гуменным. Дві неділі в липци/юлию і три в серпни/авґусті буде мож видіти і привчыти ся такым ремеслам як гончарство, ремінярство, ковальство, ткацтво, корытарство, шындлярство ци роботі зо соломом. Єдночасно участны будут мочы одвидіти скансен і окремы ремесельны майстерні. Проґрам буде достосуваный до актуальных епідемічных ограничынь принятых для окресу Гуменне.

Малопольскій Фестіваль Смаку 2021

По річній перерві спричыненій пандемійом вертат Малопольскій Фестіваль Смаку, якій загостит в найблизшых місяцях в Старым Санчы, Тухові, Выґєлзові, Мєхові і в Креници. Проєкт єст реализуваный Самоурядом Малопольского Воєвідства разом з ґмінами. Перша фестівальова подія пройде заран, 10. липця/юлия, в Старым Санчы, а послідня 3.-4. вересня/септембра в Креници. Зрыхтуваны сут показы варіня получены з деґустацийом, продаж локальных страв і выступы музичных ансамблів. На старосандецкым рынку одбуде ся і малопольскій пілфінал Загальнопольского Фестівалю Кружків Сельскых Ґаздынь «Польща од кухні». Його цілю єст шырити туристичны атракциі в воєвідстві, кулінарну дідовизну, локальну культуру і традицию. Заран в Старым Санчы выберут фіналисткы, якы будут репрезентувати малопольскє воєвідство в фіналі Фестівалю.

VIII Ліґницкій Фестіваль Культур

Так само заран, 10. липця/юлия, о 15.00 годині, на подвірци Рыцарской Академіі в Ліґници одбуде ся 8. Ліґницкій Фестіваль Культур «Хто сідит на міди (меджы)?». Цілю фестівалю єст презентация традицийых культур выступуючых на обшыри ліґницко-ґлоґівского мідьового басену. В проґрамі артистичны выступы фольклорных ансамблів, стоіска з ремеслом і кулінариями ци варштаты загыбаючых професий. Фестіваль має вказувати на богату культурну традицию реґіону, яку презентуют Полякы з Кресів, Босні, Буковины, Лемкы, Ромы ци Німці. Вступне на подію дармо.

Ансамбль Гудакы выбраный до показовой селекциі фестівалю WOMEX

На конец добра віст од ансамблю Hudaki Village Band, якого музичны творы часто мож почути в нашым радию. Ансамбль был выбраный до офіцийной показовой селекциі тогорічного фестівалю WOMEX, якій одбуде ся в Порто в Портуґалиі на конец жолтня/октобра. Гудакы то русиньска фольклорна ґрупа зо села Нижнє Селище, основана в 2001 році. На репертуар ансамблю складают ся автентичны русиньскы пісні і мелодиі з околичных сел Підкарпатской Руси. В презентуваній музиці видны сут і влияня локальной меджекультуровости, румуньскы, єврейскы ци ромскы. WOMEX то престіжный медженародный проєкт, якій сперат і розвиват світову музику. Його головном подійом єст шторічна выстава в ріжных місцях Европы. Інтеґрує торгы, презентациі, конференциі, показы фільмів, нетворкінґовы сесиі і нагороды. Являт ся найбарже розмаітым і реализуваным на шыроку скалю выставовым фестівальом і торгами музикы на світі.