Сумар дня на 9. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 9. лютого/фебруара 2023 р.

ХВІІ СКР одбуде ся в серпни/авґусті в Сербіі

XVII Світовый Конґрес Русинів одбуде ся в днях 17.-19. серпня/авґуста 2023 р. в сербскым Новым Саді. Так рішыла орґанізация Руска Матка, котра в тым році орґанізує конґрес. Руска Матка своє засідала в пятницю 3. лютого/фебруара. Вчас робочой стрічы, котру вюл председа общества, Михайло Фейса, бесідували о проґрамі конґресу, котрый буде святочно одкрытый в фоає Сербского Нацийонального Театру в Новым Саді выставом і культурным проґрамом. Другій і третій ден конґресу, в рамках котрых будут проходити пленарны засіданя і засіданя конґресовых комісий, будут проходити на Філософічным Факультеті Новосадского Університету. Фейса вчас стрічі бесідувал о тым, же мают замір выдати з конґресу науковый збірник і книжку абстрактів. Заплянувану дату XVII СКР іщы потвердят при кінци лютого/фебруара, коли буде проходило засіданя Світовой Рады Русинів.

Ци Мукачівска Єпархія перейде на новый стиль?

Вчера сме подали, што Украіньска Грекокатолицка Церков на Украіні і в Польщы приняли рішыня перейти на тзв. новоюлияньскій календар. Тепер о тым роздумує і русиньска Мукачівска Грекокатолицка Єпархія, о чым мал поінформувати мукачівскій владыка Ніль (Лущак). Рішыня, ци єпархія переходит на новый стиль (і ци буде то григорияньскій, ци новоюлияньскій календар), має быти підняте 10. лютого/фебруара на засіданю єпархіі.

#слово #язык #книга

Земплиньска Бібліотека в Требішові має для одвиджаючых тепер приготовлену в своіх просторах выставу книжок і часописів для діти і молодежы нацийональных меншын, котры жыют на Словациі, під назвом #slovo#jazyk#kniha (#слово#язык#книга). Выставу выпожычыл BIBIANA – Медженародный Дім Уменя про діти в Братиславі, і в требішовскій бібліотеці буде она доступна до кінця лютого/фебруара. Выстава представлят і вказує творчіст і літературне богатство меншын, котры жыют на териториі Словациі і сохраняют свій материньскый язык, культуру і достоменніст. Презентує не лем вызнаны на Словациі меншыны, але і культуру вєтнамской меншыны, котра як раз тепер старат ся о офіцияльне вызнаня.

Русиньскы храмы мают новы авдийопровідникы

Дальшых пят деревяных храмів на обшыри Пряшівского Самосправного Краю здобыло туристичны авдийопровідникы. В Гервартові, Кориівцях, Фричці, Грабовій Розтоці і в Тополи туристы можут выслухати выклад в дакілько языках. В двох русиньскых деревяных церквах прибыли авдийопровідникы, в котрых мож выбрати і русиньскій язык. Влони прибыли авдийопровідникы до храмів в Брежанах (колиси назва села была Буяк), Ялинці, Вышнім Комарнику і в Яловій. Вшытко тото діє ся в рамках проєкту КОТР Северовыход Словациі під назвом Одкрыты храмы. Сес проєкт обсягує вытворіня авдийопровідників, промоцийных материялів і цілковиту підпору туристичного руху в храмах, котры правом называны сут перлинами сходу. Тексты до авдийопровідників прочытат по словацкы русиньскій актор і співак Ладислав Ладомиряк, котрый донедавна был і членом драматичного колективу Театру Александра Духновича в Пряшові. Як родак з области прочытал і русиньску версию о церкви в Грабовій Розтоці. Русиньского авдийопровідника до Тополі прочытал співак і модератор Штефан Штець.