Сумар дня на 9. марця 2022 р.

Приносиме вам сумар медияльной ґрупы ЛЕМ.фм+ на ден 9. марця 2022 р.

Засідала Комісия про Нацийональны Меншыны і Етнічны Ґрупы

Перед тыжньом, в понедільок – 28. лютого/фебруара, проходило засіданя Комісиі про Нацийональны Меншыны і Етнічны Ґрупы Рады Влады Словацкой Республикы про людскы права, нацийональны меншыны і родову рівніст. Члены бесідували м.ін. про ситуацию Фонду на Підпору Культуры Нацийональных Меншын, якій розділят грошы на діяльніст меншыновых орґанізаций. Найбарже проблематичным дале остає, што конкурсы оголошуваны сут барз пізно і орґанізациі мают проблемы з реализацийом задач. В звязку з абсенцийом директора Секциі Нацийонального Высыланя RTVS Аттілы Ловас, тему нацийонального высыланя перенесли на наступне засіданя. Ласло Буковскій, полномічный влады про нацийональны меншыны, дал справопис про стан хоснуваня мешныновых языків – констатация є, што видно в тій обшыри проґрес. В звязку з результатами списуваня, змінит ся список сел і міст, в котрых будут двоязычны таблиці і в котрых меншыновый язык буде урядово хоснуваный. До 15. марця покликаны будут робочы ґрупы про кажду меншыну, котры такій список зрыхтуют.

Празднуваня з Лукасєвичом

В понедільок в Коросні прошли торжественны подіі звязаны з одкрытьом празднуваня Року Ігнатия Лукасєвича в Польщы. В Музею Нафтового і Ґазовничого Промыслу в Бубрці одбыло ся симпозиюм посвячене тому вынахідникови, підприємці і соспільникови. На подіях присутный был м.ін. Мінітер Культуры і Нацийональной Спадковины Пьотр Ґліньскій. Празднуваня Року Лукасєвича заплянуваны сут на вельо місяців в ріжных місцях польской державы. Вчера, точно в 200. річницю народин основателя першой во світі копальні нафтовой ропы, святкуваня прошли і в Ґорлицях. Лукасєвич запрашал до спільного літаня балоном, в Реґіональным Музею одкрыли выставу о жытю і діяльности Лукасєвича, а вечером на ґорлицкым рынку прошол концерт полученый з демонстрацийом підпоры для Украіны.

На заході мают новы амбулянсы

Ліґницка Служба Скорой Медичной Помочы приняла три новы кареткы дедикуваны для Польковиц, Любіна і Ліґниці. Двi послідні сфінансувало Міністерство Здоровля, а каретка для Польковиц была куплена з фундушів ґміны Польковиці. Заступит попереднє авто, котре было уж міцно выексплоатуване – были місяці, в котрых іздило по 10 тис. км. Ґміна передала на закуп каректы 460 тис. зл. Вшыткы три амбулянсы сут вполни выпосажены, достосуваны нести поміч пациєнтам на найсучаснійшым рівни.

Ци реакторы SMR найдут ся в Мідяным Басені?

Коло рока потырвают анализы, котры позволят KGHM окрислити дрібницьовы вымаганя будовы атомовой електровні. Опрацувана в тым часі документация даст тіж одповід на звіданя, де повинны станути модуловы реакторы SMR. Подля рахунків реакторы тоты, з котрых першы мают рушыти до 2029 рока, выґенеруют коло 120% днешнього схоснуваня енерґіі KGHM, а емісия діоксиду карбону буде зредукувана о 8 млн тон на рік. В рамах веденой найближшый рік документацийой анализы окрислят м.ін. параметры, котры треба буде сполнити, жебы на даным терені поставити електровню, напр. одповідні ґеолоґічны условія звязаны з сейсмічном стабльністю. По окрисліню детермінантів локализациі власти KGHM будут бесідувати з самоурядами, котрых обшыри сполняют технічны вымаганя. Як подал віцепрезес фірмы Анджей Кенсобок – Мідяный Басен з цілом його специфіком тіж входит в рахубу.

Фот. Ґорлицкій Уряд Міста