Свідник буде мати соціалный подник

Спущіня соціалного поднику приготовлює в тых днях місто Свідник. О планах свідницькой радніці інформує аґентура TASR. Фунґовати бы мав уж в місяці апріль.

Окрім підниманя робітности має подля говоркыні міста Крістіны Тхіровой підпорити головно робітность соціално зневыгодненых ґруп.

На зачатку ставебны роботы

„Предметом діялности буде на початку головно ставебна діялность, котра є повязана з розвитком містьского маєтку, його утримованьом і меншыма роботами, о котры обще ставебны фірмы інтерес не мають,“ повіла про аґентуру пріматорка Свідника Марцела Іванчова.

Як далше інформовала, поступно має быти діялность фірмы розшырена о выробу брікет на выгріваня. Того часу робить ся за словами пріматоркы на технічнім і орґанізачнім забезпечіню тых головных актівностей.

Про інтересуючіх ся о роботу в соціалнім поднику будуть условія публікованы почас місяця марец. В першій фазі планують взяти до роботы штирьох робітників, пак ся їх кількость звекшыть.

Фінанцованя з міністерства

„Базов соціалного поднику будуть містьскы просторы на Стропківскій уліці. В найблизшых тыжднях буде проходити забезпечіня просторів, забезпечіня робочого серсану, будуть ся принимати робітници а буде роблена з тым повязана адміністратіва, але і менежованя першой роботы,“ повіла про аґентуру Тхірова.

Фінанцованя соціалного поднику было підпорене реґіоналнов дотаційов з Міністерства інвестіцій, реґіоналного розвитку і інформатізації Словацькой републікы в сумі 56 тісяч евр. Місто має сполуфінанцованя 14 тісяч евр.

На выкрытя початочных вытрат собі соціалный подник взяв і пожычку в сумі 15 тісяч евр, котру схвалило містьске заступительство.

Соціалный подник має і Чірч

Свою фірму має і село Чірч в окресі Стара Любовня. Соціалный подник Солиско Чірч выникнув у 2018-ім році. Наповно фунґує од апріля 2019-го року і так само є фірма заміряна головно на ставебны роботы.

Фірма має за собов комплетну реконштрукцію Гасічской збройніці, затепліня фотбалового штадіона, реконштруцкію і прибудованя Матерьской школы, будованя комунітного центру, реконштуцкію арендованых квартелів ці обнову старой деревяной хыжы, в котрій выникнув сельскый музей.

Жрідло фотоґрафії: Wikipedia.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА