Свідник рихтує нову турістічну атракцію

Новов турістічнов атракційов міста Свідник має быти выглядкова вежа. Радніця єй хоче збудовати над містом, коло ліжарьского влеку. Цілковы вытраты на выбудованя мають быти понад 60 тісяч евр.

„Якраз в тім часі, коли є барз правдоподобне, же люди не будуть подорожыти на вакації до заграніча, треба приготовити достаток атрактівных місць в селах і містах, жебы сьме турістічный рух дакус наштартовали. Зато думам, же має досправды велике значіня тоту вежу збудовати і докінчіти,“ повіла про аґентуру TASR пріматорка міста Свідник Марцела Іванчова.

Треба здобыти екстерьны грошы

Проєкт приготовлюють приблизно рік і пів. За словами пріматоркы вже раз хотіли здобыти дотацію в рамках черезгранічной співпраці, но не были успішны.

„Теперь сьме пожадали о дотацію Уряд підпредседу влады Словацькой републікы про інвестіції і інформатізацію в области реґіоналного розвитку, де маєме жадость о фінанцованя того проєкту,“ повіла про аґентуру Іванчова.

Свідник зажадав 50 тісяч евр, решту бы місто дофінанцовало. Пріматорка підкреслює, же конечну ціну становить конкурз, а і там хотять тискати на розумну ціну. „Потребуєме досправды в тім часі здобыти екстерьны грошы, бо розрахунок міста буде напруженый в тім році. Віриме, же будеме успішны в поданю жадости. Моментално чекаме на оціньованя,“ приближыла.

Єдна з можливостей наштартовати реґіон

Вежу хотять звудовати на місці того часу нефункчного ліжарьского велку над містом. Подля слов пріматоркы буде дакус атіпічна. „На спіднім штоку буде малый притулок із склянянов стінов. Знам собі представити, же вечур то може быти барз шумный погляд. Над притулком будуть іщі два класічны штокы.“

Пріматорка вірить, же ся вежу подарить збудовати чімскоріше, і кедь доповнила, же на місці наперед треба зробити теренны управы, бо влек нехоснованьом вже доста зароснув. Пак ся пустять до будованя. Термін добудованя залежыть за їй словами од наштартованя єконімікы, але і од того, ці будуть знати забезпечіти фірму, котра єй выбудує.

„Така вежа дасть ся збудовати за два – три місяці реалного часу, значіть і зато апелую на одповідных членів влады, жебы проєктам реґіоналного розвитку реално присвятили увагу. То єдна з можливостей, як наштартовати реґіоны, жебы сьме знова не были лем добігаючі реґіоны в порівнаню з центром. Не чекам, же ту дотягнеме великый промысл, но мусиме будовати на розвитку турістічного руху,“ закінчіла Марцела Іванчова.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА