Свідник уж має про турістів і проводників. Вкажуть і околіцю

Цертіфікованы службы проводників запровадив в тых днях Турістічный інформачный центер Свідник. Як аґентуру TASR інформовала говоркыня міста Крістіна Тхірова, такы службы дотеперь в реґіоні не были.

Турістічный інформачный центер Свідник уж нову службу і спробовав, кедже місто на початку турістічной сезоны навщівила 48-членна ґрупа турістів.

„Навщівници мали інтерес о переглядку Дукляньского перевалу і далшых воєньскых памяток, деревяного храму в Ладомировій, записаного в світовім списку дідовизны UNESCO, і хотіли веце дізнати ся о нашім місті – історії, інтересностях, а о ділах зо жывота,“ повіла Мартіна Лазенґова, котра є цертіфікованым проводником Турістічного інформачного центра Свідник.

За їй словами турісты у Свіднику і в околіці мають даяку обявльовати унікатну дідовизну і історію. Воєньска історія вєдно з Карпатьсков деревянов стежков, котра є характерістічна про реґіон, стає штораз веце выгляданов локалітов і атракційов нелем про навщівників із Словакії, але і зо заграніча.

Турістічный інформачный центер Свідник уж од початку реґістровав інтерес о службы проводників, но так само собі усвідомльовали проблему з тым, же бракують цертіфікованы особы в реґоні.

„На выконованя такой роботы треба здобыти цертіфікат о абсолвованю акредітованого навчалного проґраму у фаху, выданый освітньов інштітуційов акредітованов Міністерством школства, наукы, баданя і шпорту Словацькой републікы,“ доповнила Лазенґова.

Інформації о новых службах про турістів мож найти на вебсайті міста Свідник, но мож ся о них дізнати і на соціалных сітях міста, телефонічно ці прямо в інфоцентрі.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА