Голосник

Світова рада буде засідати в Румунії. Одсвяткуть юбілей тамтешньой русиньской орґанізації

29-го фебруара 2020-го року одбуде ся в Сучаві в Румунії 3-тє засіданя Світовой рады Русинів у меджінконресовім періоді по XV. Світовім конґресі Русинів.

Участны засіданя будуть брати участь і на святкованю 20-го юбілею Културного общества Русинів Румунії (оріґ. Культурне товариство русинів Романії), котре є од 2003-го року членом конґресу. Орґанізація, котру од основаня веде Ґеорґій Фірцак, з той нагоды притоволює святочны події, котры будуть проходити од 27-го фебруара до 1-го марца.

Засіданя без комісій

Як інформовав председа Світового конґресу Русинів Штефан Лявинець, найблизше засіданя Світовой рады буде проходити без засідань окремых конґресовых комісій.

В проґрамі находить ся наприклад обговоріня святкованя Світового дня Русинів, котре буде проходити 23-го марца на Словакії і святкованя 30-ой річніці од основаня Русиньской оброды на Словеньску, основаючого члена конґресу. Член Світовой рады Русинів за Україну Микола Бобинець має на раді інформовати о переписі населіня, котрый тот рік проходить на Україні по майже 20-ох роках.

О діялности має Світового форуму русиньской молодежи бы мав у Румунії інформовати подля проґраму його председа Петро Ярінчік.  Членове Світовой рады будуть занимати ся і пропозіціями а крітеріями на тогорічне уділіня Премії Василя Турока – Гетеша.

20 років общества

Участны будуть брати участь і на святкованях юбілею свойой членськой орґанізації за Румунію – Културного общества Русинів Румунії. Общество было засноване в році 2000 з ініціатівы Ґеорґія Фірцака, котрый дакілько місяців по тім став депутатом румуньского парламенту як представлитель Русинів.

Центер общества находить ся в місті Дева і має свої філії в пятьох реґіонах – Алба, Клюж, Гунедоара, Марамуреш і Сучава. Меджі цілі орґанізації належыть пропаґація меджі Русинами інтересу о културу предків і самоусвідомліня ці інформованя румуньской сполочности о існованю Русинів як окремой народности. Общество то реалізує головно посередництвом лекцій, културных подій, публікованьом інфомачных матеріалів і книжок в румуньскім і русиньскім языку, ці каждорічным орґанізованьом Дня Русинів Румунії.

В Деві, де є головный центер юбілуючой орґанізації, проходив у 2015-ім році ХІІІ. Світовый конґрес Русинів.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі