Світовый Конґрес Русинів завитат на Лемковину

В днях 10.-11. вересня/септембра 2021 р. одбуде ся ХVІ Світовый Конґрес Русинів (СКР). Стріча русиньскых орґанізаций і активістів завитат на Лемковину. Конґресовы засіданя будут проходити в курортным місті Крениця.

Тогорічным орґанізатором СКР є членьска орґанізация з Польщы, Стоваришыня Лемків. Конґрес як найвысша статутова власт той общерусиньской плятформы буде занимал ся м.ін. выпрацуваньом плянів на дальшу діяльніст русиньскых осередків во світі, але і розвяже своі формальны задачы, пройдут м.ін. выборы новых членів Світовой Рады Русинів (СРР).

Початок не одраз в Креници

Хоц XVI СКР буде доцільово одбывал ся в Креници, а його початок буде в пятницю рано, то в четвер його делеґаты і запрошены гості з заграниці возмут участ в святкуванях 30. річниці реактивациі Стоваришыня «Руска Бурса» в Ґорлицях. Святкуваня тоты зачнут ся ґаля концертом на ґорлицкым рынку, а пак перенесут ся в до сідибы той найстаршой лемківской орґанізациі, де одкрыта буде таблиця памяти Богдана Ґамбаля, надаюча його імя ґорлицкій Бурсі.

Конґрес офіцияльно буде одкрытый в пятницю, 10. вересня/септембра, в бальовій сали в Старым Здройовым Домі в Креници. В тій части одбуде ся привитаня запрошеных гости. На початку конґресу будут оголошены лавреаты преміі ім. Василя Турока-Гетеша за 2020 і 2021 рр. В тій части, окрем выборів президияльных власти конґресу, будут мати выступліня і запрошены гості.

Окрем польскых самоурядовых власти, свою присутніст на конґресі потвердил хоц бы ґенеральный консуль Словацкой Республикы в Кракові, Томаш Кашай.

В першый ден Конґресу пройде так само засіданя Х Медженародного Форум Русиньской Молодежы, якого задачом єст анґажувати молоде поколіня активістів до спільного діяня на благо русиньской/лемківской культуры і взаімна підпора на меджедержавным рівни.

Выборчый ден

Другій ден ХVІ СКР буде посвяченый головно выборам новых власти і членів СРР – выконавчого орґану Конґресу. В СРР засідат по єдным члені выбраным за кажду орґанізацию походячу з державы, яка є членом СКР. Окрем того, будут выборы до контрольного орґану – Ревізийной Комісиі СКР.

Конґрес на завершыня має збудувати позициі і представити постуляты на дальшы рокы свойой активности. Зо зголошуваных постулятів пак повинны быти приняты постановы і резолюциі, дотулячы ся головных проблемів, з якыма актуально стрічают ся Русины/Лемкы.

На конец присутны делеґаты мают рішыти о місци XVII СКР, якій пляново мал бы ся одбыти в 2023 р. Попередній, ХV СКР проходил на Словациі.