Свято Культуры Лемків – Русинів. Днес фестіваль в Червеным Кляшторі

Днес, в неділю 22. липця/юля 2018 р. в Червеным Кляшторі над Дунайцьом проходит шторічний фестіваль – «Свято Културы Лемків – Русинів». Тота русиньска подія, котра своім наголовком вказує на нерозлучніст народа по польскій і словацкій стороні Карпат, рік в рік притігат більше чысло заінтересуваных. В проґрамі днешнього фестівалю видіти мож артистів телевізийного шов Zem spieva / Земля співат.

Окрем сценічных выступлінь, фестіваль зачне ся молитовном стрічом. В само полудне одслужена буде Божеска Літургія св. Йоана Золотоустого, правлена в церковно-славяньскым языку. Богослужыня очелювал буде попрадскій протопресвитер Ярослав Матоляк. Пак на обшыри курортного здрою в Червеным Кляшторі пройде крестний хід.

О 15.00 год. зачне ся культурний проґрам. В першым шорі вызвучыт фольклористычний концерт «А чыя то хыжа». В тій части презентуваны будут выступліня колективів зо Словациі і Польщы. Позерати буде мож на послідніх участників словацкого шов Земля співат – ансамблі «Поляна» ци «Майдан». З Польщы приде Лемківскій Ансамбль Пісні і Танця «Ластівочка», колектив Стоваришыня Лемків, достовірно плекаючий фольклор Русинів з Лемковины.

Друга част сценічных выступлінь то концерты співака Штефана Штеця вєдно з Фольклорным Ансамбльом «Горнад», якы были лавреатами першой едициі проґраму Zem spieva / Земля співат. Штець по успішні проведеным шов, выдал свою першу платню. Почути мож на ній головно традицийны русиньскы пісні з обшыри цілой Карпатской Руси. Днес презентуваний буде як раз нон репертуар. Пригривати му будут гудакы з ансамблю «Горнад», з котрым сам пару років выступувал.

Радийо ЛЕМ.фм тримат медияльний патронат над днешнім Святом Культуры Лемків – Русинів. Детальныx інформаций глядайте на залученым афішы.