ТАД одпремєрує пєсу Познатый непознатый

На пятніцю 18-го октобра 2019-го року притовив Театер Александра Духновіча в Пряшові свою першу премєру в театралній сезоні 2019/2020. Пєса Познатый непознатый (Homo sapiens) в режії Антона Коренчія є зроблена на мотівы пєсы Владіміра Гурбана Владімірова Homo sapiens.

Режісер підкреслив, же публіка ся не мусить бояти важных тем, чекать на вас комічна обробка, котра ся выразить і ку сучасности.

Театер з правіку 

„Homo sapiens, чоловік розумный, як сьме самы себе пышно назвали, є безпохыбно найнасилнішым сотворіньом на планеті. Докажеме єй іщі уратовати? Докажеме уратовати самых себе, кедь ани зданя не маєме, хто сьме? На основі чого вырішуєме? Одкыль і де крачаме? Насилство нас проводить од початку і не здасть ся, же бы ся рихтовало счезнути. Насилство лежыть в сердці людьской културы і в сердці каждого єдного з нас. Были бы сьме то іщі все мы – без насилства? Без културы? Без жертв? Без священого? І хочеме досправды знати правду?“

Така є анотація найновішой пєсы, котру Театер Александра Духновіча од пятніці буде мати у своїм репертоарі. Інсценація є зроблена вольні на мотівы пєсы, котра выникла у 1924-ім.

Автор, властным меном Владімір Конштантін Гурбан, быв словацькый євангелицькый священик, драматік, публіціста, єден із найвекшых умелців войводиньскых Словаків. Homo sapiens є першов частьов його задумованой трілоґії. Хотів ньов доказати незмінность чоловіка як бытя, котре є овладане голодом і сексуалностьов.

Пєса одогравать ся на переломі палеоліту і неоліту. Важну роль в ній має ґесто, міміка, рух, світловы і звуковы ефекты. Но пєса із 1924-го року была лем іншпіраційов про інсценаторів у пряшівскім Театрі Александра Духновіча. Публіка ся може тішыти на цалком нове обробліня темы, котре рефлектує і сучасность.

„ВГВ ня іншпіровав думков інсценовати театер в правіку. Посмотрити ся на чоловіка і людьску сполочность з погляду їй коріня, так як выникала і існовала векшыну людьской історії. Модерна історія творить лем їй маленьку часть і окрім реквізіт, костімів і мас кличучіх по рівности не приность нич прінціпіално нове,“ говорить режісер Антон Коренчі.

„Централныма темами про мене были насилство, механізм агнеця, міфы, але і гумор. Зато собі думам, же публіка ся не мусить бояти споминаных важных тем, намагали сьме ся то зробити скоріше комічно і на кінцю так дакус выразити ся і ку сучасности,“ продовжує далше про нашу редакцію Коренчі.

В новій пєсі Познатый непознатый (Homo sapiens), котра буде мати премєру на Великій сцені в пятніцю о 19.00 год., буде мож видіти вшыткы ґенерації акторів театру – Василя Русиняка, Осифа Ткача, Осифа Пантликаша, Мартіна Оравца, Владиміра Рогача, Людмилу Лукачікову, Владиміру Брегову, Зденку Кваскову і Івету Фейкову.

Антон Коренчі

Режісер Антон Коренчі (1986 р.) співпрацує з Театром Александра Духновіча по першый раз. Выштудовав театралну режію на Высокій школі музичных умень в Братіславі, де пізніше робив і педаґоґа як асістент.

Його мено є повязане з вецеро інсценаціями, котры робив про Театер a.гa (Divadlo a.ha). Далше продовжовав і в Театрі Мала сцена СТУ (Divadlo Malá scnéna STU), ці в Словацькім народнім театрі (Slovenské národné divadlo). Співпрацовав і з Словацькым розгласом (Slovenský rozhlas), Штатным театром Кошыці (Štátne divadlo Košice) ці Братіславскым ляльковым театром (Bratislavské bábkové divadlo). Довєдна режіровав 24 професіоналных пєс, за веце із них здобыв премію од Літературного фонду (Literárny fond).

В році 2017 засновав обчаньске здружіня АнтіТеатро (AntiTeatro), незалежну платформу про професіоналне перформатівне уменя, в рамках котрого хоче занимати ся баданьом і експеріментами в области перформатівного уменя.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА