ТАД одпремєрує приповідку Царь пав

Русиньскый Театер Александра Духновіча в Пряшові на пятніцю 9-го юла 2021-го року рихтує премєру приповідкы Царь пав. Головну роль собі заграє Ладіслав Ладомиряк. Приповідку повну музикы режійно приготовлила Зузана Ґалкова.

„Колись давно в царьстві за морьом жыло ся в безмірнім добробыті. Но люди вшытко зачали брати поверьхно, добробыт їм закрыв очі і виділи лем вонкашню красу. То царя доброго і справедливого барз скламало і його смуток і гнів запричінили, же вшыткы його підданы змінили ся на павы. Кажду ніч на пава змінить ся і царь. Сам і опущеный глядать щастя. Хто і што царя выслободить? Буде то любов? В іншім царьстві, далеко од моря, якраз народила ся красна прінцезна Руженка, котра своїм добрым сердцьом перенесе ся через вшыткы проблемы,“ пише ся в анотації новой приповідковой пєсы.

Приповідка Царь пав є на мотівы мадам д‘Улнуа, котра в 17-ім столітю позберала і обробила приповідкы, котры люди бісідовали собі на французькых селах. Кедьже была із шляхты – баронка, оддзеркалило ся то і на приповідках, котры обсягують вельо красы і одкрывають брану до чарокрасной, пречудесной загороды.

Окрім Ладомиряка в ролях представлять ся Зденка Кваскова, Владимір Рогач, Мартін Оравец, Осиф Пантликаш, Ярослава Сисакова в алтернації із Владиміров Штефаніковов, Івета Фейкова і Михал Куцер.

Царь пав є 385-ов премєров Театру Александра Духновіча в його 75-ій сезоні. Премєра одбуде ся на Великій сцені ТАД о 17.00 год.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА