Талергофскій ден в Чорным

В найблизшу суботу, 30. вересня/септембра, в селі Чорне пройде ден памяти про перший концентрацийний лаґєр в Европі – Талергоф, в якым в роках 1914-1917 были інтернуваны і мучены Русины. 

Тогорічны упамятніня в Чорным повязаны сут з округлом, 100. річницьом ліквідациі талергофского лаґру та з одкрытьом едукацийно-історичной стежкы попри місци, де находит ся памятник присвячений Максимови Сандовичови і Талергофцям. 

В проґрамі подіі, яка зачне ся о 14.00 год., сут м.ін. заупокійне богослужыня за жертвы талергофского лаґру, молебен до священномученика Максима Ґорлицкого, проповід православного владыкы перемышльско-ґорлицкого Паісия, выступліня запрошеных гости та звиджаня ново одкрытой стежкы. 

Талергофскій памятник

Поставліня памятника в Чорным было повязане з нацийональном памятю Лемків про талергофскій лаґєр. В 1934 році з ініциятивы православного пароха села Чорне, о. Гаврилкова, в місцевости зачали орґанізувати шторічны талергофскы упамятніня. Памятник присвячений православному священникови – о. Максимови Сандовичови, розстріляному австрийскыма жандармами в 1914 році, та Талергофцям одкрыто і посвячено в 20. річницю смерти священника і початку поневоліня «русского» народу з Лемковины в Талергофі, 9. вересня/септембра 1934 рока.

Ведучым орґанізацийного комітету был парох Святковы Великой – о. Антон Криницкій. Вчас торжественного посвячыня, котре очелил делеґат митрополиты варшавского і цілой Польщы Діонісия, остроґскій єпископ Симон, на богослужынях зобрало ся близко 7 тис. вірных з Лемковины. Владыка Симон в талергофскых упамятнінях в Чорным брал участ трираз. 

Памятник был одреставруваний стараньом Єпархіяльного Осередка Православной Культуры «Елпіс» в 2014 році.