Талерговскій ден в ЗША

Лемко Союз, еміґрацийна орґанізация з долгыма традициями, просит 4. серпня/авґуста 2018 р. на Талерговскій Ден Памяти, якій пройде в Гіґанам (Higganum) в штаті Коннектікет в ЗША. В короткым проґрамі передвиджено богослужыня, а пак спільне припоминаня жертв єдного з ґеноцидів русиньского народа.

Талерговскій ден од років проходит в перший вікенд серпня/авґуста. Нацийональна памят серед американьскых Русинів все была важна, будувала іх достоменніст і звязок зо Старым Крайом. В тот ден орґанізаторы хотят припомнути о десятках тисячів мужчын, жен і діти, котры были преслідуваны, стратили здоровля або вмерли в австрийскым концентрацийным лаґрі, положеным в селі Талергоф на полудне от міста Ґрац в Австриі в 1914-1917 рр.

Лемко Союз, памятат і о погыбшых з карпатского реґіону в часі воєнных операций в обоіх світовых войнах. Общество підчеркує і тото, што по ІІ СВ корінне русиньскє населіня было выкорчуване в результаті повоєнных діянь комуністів, а сама акция Вісла і концентрацийний лаґєр в Явожні были траґічны в своіх результатах для Русинів в Польщы.

Вшыткы тоты смутны нагоды сут причынком до того, што Лемко Союз просит найперше на панихіду (поч. 10.00 год.) за жертвы террорів ХХ столітя, а пак на спільну стрічу в Карпатскым Інституті в Гіґанам в штаті Коннектікет. При Інституті находит ся обшыриний архів Лемко Союза, якій сохранений был по розпроданю маєтку і найвекшого кризису орґанізациі, котрий такой довюл до єй ліквідациі. Сес архів буде доступний в тот ден до перезераня. Тепер, постійно продолжана є реактивация обшырной діяльности Лемко Союза. Дотогочасны заслугы довоєнного і пізнійшого Лемко Союза сут неоцінены.