Театер Духновіча одпремєрує Островского І мудріяш домудрує

Театер Александра Духновіча в Пряшові одпремєрує в середу 14-го октобра 2020-го року о 20.00 год. на своїй Великій сцені пєсу на мотівы Александра Николаєвіча Островского під назвов І мудріяш домудрує. Буде то якбач остатнє представліня в театрі на довшый час.

Русиньскый театер хотів Островского премєровати іщі в ярьній части попередньой театралной сезоны. Кедьже од марця были прияти в повязаню з пандемійов нового тіпу коронавірусу обмеджіня, і были заказаны і театралны выступліня, драматічный колектів мусив рішыти о перенесіню даты премєры.

В октобровім проґрамі театру была дата премєры пєсы І мудріяш домудрує оголошена на пятніцю 23-го октобра. Но вдяка новым рештрікціям, котры влада Словацькой препублікы прияла в понедільок 12-го октобра, театер вже другый раз мусив перенести премєру Островского пєсы.

З дурных ся не треба высмівати…

„З дурных людей не треба ся высмівати, треба выхосновати їх слабости,“ зачінать анотація ку новій пєсі в репартоарі нашого театру.

„Ґлумов знать, як здобыти собі поставліня. Днесь є важным досягнути го посередництвом тых справных людей. Ґротескова історія о хамтивости і компліментах, в котрій молодый Ґлумов рихтує ся карьєрно поступити з выбрушеным, богатым языком і софістікованыма бісідами. По стопятьдесятьох роках є пєса Александра Николаєвіча Островского іщі все актуална і зображує днешній способ комунікації тых ‚найвысшых‘, де тоты ‚малы‘ знають то добрі выхосновати.“

Головный герой Ґлумов є молодым автором памфлетів, котры крітікують высоку верству сполочности, но сам має амбіції стати єдным з них. Краса, шарм, і маніпулація в пєсі бють ся з наівітов высокопоставленых урядників і богатых людей, зато Ґлумов мусить зробити план, як по хырбетах тых справных людей вылізти там, де хоче.

Вшыткы ґенерації акторів

Нову пєсу про Театер Александра Духновіча режійно приготовив Матуш Ольга, котрый є на дочках русиньской сцены знамый головно з режірованя пєс словацькых класіків. Пєсу наштував майже цілый драматічный колектів театру.

В інсценації І мудрый домудрує представить ся цілый віковый діапазон акторів. За старшу ґенерацію герців мож на сцені видіти Светлану Шковранову, Йосифа Ткача і Василя Русиняка. Середню ґенерацію представлють Людмила Лукачікова, Ярослава Сисакова, Любомір Міндош, Владиміра Шефанікова і Йосиф Пантликаш. В пєсі представлять ся в ролях і акторы молодшой ґенерації як Зденка Кваскова, Ладислав Ладомиряк, Михал Куцер, Володимір Рогач і Мартін Оревець.

Драматурґічно до репертоару театру пєсу приготовила Терезія Міндошова, о переклад сценаря постарав ся Ярослав Сисак.

Александер Островскый

Александер Николаєвіч Островскый (рр. 1823 – 1886), котрого текст обробив Театер Александра Духновіча, быв російскый драматік. У своїх творах замірявав ся головно на жывот московской сполочности.

Творив у періоді реалізму і його драматічны творы рахують ся з творами його сучасників Лева Николаєвіча Толстого, Фйодора Михаіловіча Достоєвского і Івана Серґеєвіча Турґенєва.

Премєра пєсы І мудріяш домудрує буде на довшый час якбач посліднім высупліньом нашого театру. Од 15-го октобра вступують до платности новы наряджіня, в рамках котрых є заказане орґанізовати будьякы културно-сполоченьскы події. Платить так само заказ сходжіня ся веце як шість особ. Охранны маскы знова мусять быти хоснованы і в екстерьєрі.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА