Тест серьйозности

Нова мадярьска влада почала урядовати, і новый напрям Будапешті не хоче вказати лем в одношіню ку Бруселу, але і Києву. Кабінет нового премєра Мадяра бы хотів обновити білатералны односины із своїм выходным сусідом – Українов. Лемже так як при владі Орбана, і теперь суть фундаменталны про тоты односины права Мадярів, котры жыють на Підкарпатю.

Самособов, Київ має емінентный інтерес на тім, жебы тоты односины были обновлены. Тадь на пути ку одкрытю приступовых переговорів што до европской інтеґрації дотеперь із своїм блокованьом стоїть Будапешт.

Покля презідент Зеленьскый сниє о ускоренім вступі, а канцеларь Мерц почав снити о „придруженім членстві“, реал політіка є така, же наперед треба пересвідчіти Мадярьско, жебы обще перестало блоковати будьякы намагы о інтеґрацію

І зато не чудо, же пару днів по тім, як новый мадярьскый владный кабінет почав урядовати, одбыли ся першы онлайн мадярьско-україньскы експертны конзултації, котры одкрыла мадярьска міністерка загранічных діл Аніта Орбан із своїм резортным партнером Андрійом Сибігом за Україну.

Шефка мадярьской діпломації на своїм профілі на сіті Facebook написала, же в мадярьско-україньскых білатералных односинах є дослідна охрана прав народностных меншын пріорітнов задачов про мадярьску владу, котру треба вырішыти. Мадярьска комуніта в Закарпатьскій области є подля Аніты Орбан нелем важным елементом односин меджі тыма країнами, але і „мостом“ меджі тыма двома народами.

Реалный проґрес в тій области собі подля міністеркы выжадує „одкрытый, щірый і професіоналный діалоґ, збудованый на ясных правных ґаранаціях“.

Односно споминаных конзултацій на сіті X выразив ся і україньскый шеф діпломації. Сибіга написав довшый текст, де окрем іншого пише, же „Україна бере права народностных меншын серьйозно, і є готова забезпечіти їх в згоді із европскыма штандардами“.

Кедь україньскый шеф діпломації бісідує о тім, же права народностных меншын Україна бере серьйозно, пак бы може было веце як потребне не зістати тихо.

Не діє ся жадне велике чудо. Київ просто лем зрозумів, або холем декларує, же зрозумів, же є єдно, ці в Будапешті сидить Орбан або Мадяр, влак інтеґрації не перейде без того, жебы наперед підняти із штрекы тоту барьєру, котра на ній лежыть, і тов суть народностны права.

Самособов, мадярьска міністерка першорядо думать на права Мадярів, і головно о них, о їх правах мають быти споминаны конзултації. Но покля ся мінить леґіслатіва односно меншын, она бы мала быти універзална, не ексклузівна про єдну меншыну. То є по перше.

А теперь по друге. Сам Андрій Сибіга пише о тім, же Україна бере права народностных меншын серьйозно – права меншын, нелем Мадярів. А покля бы то так мало быти, о чім дотеперь не єм пересвідченый, пак так само треба бісідовати о тім, же серьйозный приступ собі выжадує векшы зміны, нелем зробити козметічны зміны, котры бы успокоїли мадярьскый владный кабінет што до поставліня мадярьской меншыны на Підкарпатю.

І ту ся діставаме ку вопросу, як мож бы было схосновати тот момент? А єдночасно можеме одкрыто повісти, же не схосновати го было бы хыбов.

Кедь україньскый шеф діпломації бісідує о тім, же права народностных меншын Україна бере серьйозно, пак бы може было веце як потребне не зістати тихо, і попри мадярьско-україньскых конзултаціях припомянути ся Києву бы мала і світова русиньска комуніта, котра зверне увагу на факт, же ку серьйозному приступу односно прав народностных меншын належыть нелем зліпшіня поставліня уж вызнаных меншын, але, і то першорядо, і вызнаня Русинів, котры в рамках днешньой Україны жыють на своїй землі – Підкарпатю, як автохтонный народ довгы стовкы років.

Можеме то назвати тест серьйозности. А вєдно із тым мож додати, же якбач не буде ліпшый момент зробити собі тест серьйозности.

Тестовати бы міг Світовый конґрес Руснів. Тест розкрыє, як серьйозно то Україна із правами меншын думать, і на кілько то є лем далша проба о досягненя свого ціля без того, жебы штось реално змінити.

Статя была написана як коментарь „Вступне до контроли“ лемківского радія lem.fm. Жрідло фотоґрафії: karpataljalap.net.