То уж певне – буде потяг до Музею Енді Варголя

Як інформує сайт rynek-kolejowy.pl, на літо заплянуваний єст старт реґулярных желізницьовых получынь з Ряшова і Санока до Меджелябірців. Підкарпатскій маршалківскій уряд рыхтує ся взновити желізницьовы получыня через Лупківскій Перевал. На тот момент проходят консультациі в обшыри допущыня до руху польского табору по словацкій стoрoні.

По парox роках перевры вертают пасажeрскы потягы на граничний одтинок Лупків-Меджелябірці, а одтамале буде мож пересісти ся на інчий потяг і поіхати вглуб Словациі. Словацка Желізниця оголосила уж перед парома днями розписку вакацийных получынь трасом, яка лучыла буде Підкарпатскє Воєвідство з Пряшівскым Крайом.

Медженародовы курсы мают быти реалізуваны в суботы і неділі од 1. липця/юлия до 3. вересня/септембра т.р. Потяг з Ряшова дотре до Меджелябірців коло 10.30 год. З Меджелябірців, де м.ін. мож одвидіти Музей Енді Варголя, буде мож інчым потягом переіхати ся до русиньского міста Гуменне і там глядати напр. історичных слідів з періоду, коли попри собі жыли гын в XVIII ст. Русины, Жыды, Словакы, Мадяры і Полякы. Назад до Ряшова потяг з Меджелабірців буде стартувал пару минут перед 18.00 год.

Получыня Санок-Меджелябірці заплянуване єст лем на суботы в літнім періоді. Урухомліня медженародовых курсів мат быти пошыріньом дотеперішньой оферты получынь, якы фунґуют в літнім часі на трасі до Лупкова. По вступных рішынях, на польскым одтинку трасы буде обовязувала ціна за переізд подля воєвідской тарифы, а не тарифы Реґіональных Перевозів (хоц получыня буде реалізуване тыма другыма), а одтинок Лупків-Меджелабірці коштувал бдуе коло 1€.

Влони, зреалізуваны были два промоцийны переізды з Ряшова до Меджелябірців, 27. серпя/авґуста та 24. вересня/септембра. Тішыли ся так великым заінтересуваньом, же уж на початку трасы бракувало сідячых місц, а пак і стоячых. Того дня вшыткы участникы переізду могли безплатні звидіти в Меджелябірцях Музей Енді Варголя, а в містецкым амфітеатрі зорґанізуваны были ріжны концерты і выступліня.