Тогорічна «Музыка заклята в дереві» і в лемківскых храмах

Неодолга, 12. червця/юна т.р., зачне ся ювілейнa 10. едиция Фестівалю на Пути Деревяной Архітектуры в Малопольщы «Музыка заклята в дереві». Як і в попередніх роках, будут на ним і лемківскы акценты.

Фестіваль є ведений в рамках Пути Деревяной Архітектуры, на котрий складат ся 254 деревяных забытковых обєктів. Но, окрем костелів, скансенів, дворів, або дзвінниц, остали до него вписаны і лемківскы церкви, котры являют ся єдныма з найкрасшых архітектонічных творів материяльной дідовизны Малопольщы.

В календар тогорічной едициі концертів сут вписаны тоты лемківскы храмы, в котрых пройдут поєдны выступы выконавців. На тот рік орґанізаторы заплянували провести концерты в двох лемківскых церквах. То вписаны в 2013 році на Листу Світовой Спадковины ЮНЕСКО храмы св. Параскєвы в Квятони та св. Михала Архангела в Брунарах Выжніх.

Окрем церкви, в попередніх едициях цікавым елементом лемківской культуры были концерты Сусанны, котра презентувала ся з піснями Петра Мурянкы. Артистка вказувала проґрам названий наголовком «В шестьох кольорах», што навязує до шестьох языків, в котрых співат – лемківскым, украіньскым, росийскым, церковнославяньскым, польскым та анґлицкым. Сусанна концертувала м.ін. в єдній з найстаршых русиньскых церкви на Лемковині – храмі Покровы Пресвятой Бородиці в Рыхвалді і костелі в Бінаровій. Обі святыні находят ся на листі ЮНЕСКО.

«Музыка заклята в дереві» то фестіваль, котрий вказує ріжны виды музыкы, од традицийных по сучасны. То тіж танцувальны видовиска і сценічны показы. Фестіваль притігат світовых артистів, але і тых меньше знаных. Сут на ним вказуваны жанры клясичной, джазовой, ци просто авторской музыкы. В тім році на Пути Деревяной Архітектуры буде мож почути звукы фортепіано, клявесину і гушель.

Ювілейну едицию прикрасит вчас одкрытя фестівалю (12.06) выступ артистів Лодзіньской Фільгармоніі – GROHMAN ORCHESTRA. Концерты, котры пройдут в спомненых лемківскых церквах одбудут ся 7. серпня/авґуста т.р., в Квятони та о тыжден (14.08) в Брунарах.

Сам Пут Деревяной Архітектуры был оснований в 2001 році за ініциятивом Малопольского Воєвідства. Причысленых єст до него 49 церкви, 125 костелів, 30 інчого рода будинків, 23 забудовы, 16 музеів, та 9 скансенів.

Більше інформаций найдете за тым мотузком, а зміст поєдных концертів долов на залученым афішы.