В передден нацийонального свята вшыткых Лемків – Дня Русина, просиме вас слухати дальшый одтинок нашой штотыжньовой передачы – «Говорить Пряшів».
5. грудня/децембра 1918 р. было віче во Фльорицні, котре записало ся в нашій памяти як вызначна, радістна, будуюча подія. Прото каждого рока 5. грудня/децембра стараме ся празднувати наше торжество. Каждый нарід має своє дакє нацийональне свято. Наше свято, хоц бездержане, то заєдно свято незалежности, еманципациі, одроджыня.
В заранішню суботу в просторах Руской Бурсы в Ґорлицях зачнеме нашы святкуваня. Премєром книжкы спомнеме на тых вшыткых вызначных люди, якы перед 102 роками были причынком до днешнього святкуваня. Але спомнеме особливо на того, котрый Ден Русина в Польщы щыро розпропаґувал, покійного Богдана Ґамбаля (1965 – 2020). Защыпил він потребу святкуваня, потребу бытя в тот ден радістным і гордым. Памят про нарід, про люди, про свою історию, то тіж своєрідне святкуваня. Будте з нами, з радийом ЛЕМ.фм, заран од 16.00 год. нажыво.
Заєдно просиме і на днешню авдицию, в котрій николи не бракує патріотичных інформаций. Джерелце, з котрого черпаме, годно быти спільне для нас вшыткых.
Коментарі