«Тот світ не загынул – будут называти нас Лемками»

«Хочеме вказати нашым дітям, як важне є плеканя культуровой спадковины предків, жебы наш світ николи не загынул і все называли нас Лемками» – бесідує Дорота Максимчак, координаторка проєкту «Тот світ не загынул – будут называти нас Лемками», котрого реалізация зачне ся в вересни/септембрі тр.

Дорота Максимчак, учытелька лемківского языка в Шкільно-Предшкільным Комплексі в Радваницях, має під опіком того рока десятеро діти – семеро учеників од першой до шестой клясы основной школы, троє предшколяків. Іщы предшколякы, а уж вчат ся лемківского языка, а іх учытелька активні діє, жебы творчо ся розвивали.

О кілько вшытко верне до нормы, кєд іде о ситуацию з пандемійом коронавіруса, то по вакациях тоты більшы і меншы школярі будут мочы вказати ся чысленній публиці. Але не лем они, бо до участи в подіях орґанізуваных в рамках проєкту запрошены будут і інчы діти, особливо тоты, котры вчат ся лемківского языка з сусіднього Пшемкова ци Любіна.

Буде забава і розбуджаня пошаны для свого

Акциі проєкту заплянувано так, жебы не лем діти могли мати з них приємніст. «В вересни/септембрі зробиме Лемківскій Пікнік над озером Глубокє. Діти з родичами будут ся добрі бавити. Будеме чытати поезию, родиче і дідове оповідят про історию і долю Лемків. Зробиме тіж конкурс родин. Треба буде ся выказати знаньом лемківской культуры» – оповідат координаторка проєкту.

На листопад/новембер заплянувано конкурс талантів – діти, якы вчат ся лемківского языка, запрезентуют своі рецитаторскы, співочы та малярскы здібности. «До конкурсу Лемківска Осін в Радваницях запросиме діти зо шкіл в Радваницях, Шпротаві і Любіні. Будеме мати специяльне жырі конкурсу, але каждый участник достане подарок за выступ» – заповідат Д. Максимчак.

Ластівочка, Своякы і інчы

Кінцьом рока Радваниці ся розспівают. «Колядами обох культру буде малюваный вечер коляд з участю школярів з Радваниц і Бучыны. Запросиме хоры з обох парохій – католицкой і православной, але і ансамблі: Ластівочку з Пшемкова і народный ансамбль Своякы з Радваниц» – заохочат Дорота Максимчак.

Послідньом подійом проєкту будут варштаты писаня ікон, якы заплянувано на марец наступного рока. В варштатах будут мочы взяти участ вшыткы охочы з ґміны Радваниці.

«Залежыт нам на тым, жебы через тоты акциі зінтеґрувати соспільство, але головні, жебы плекати лемківску культуру і вказати єй інчым» – дополнює Д. Максимчак.

Проєкт нашол ся серед 300 інчых задач, якым признано фінансуваня в проґрамі «Моє місце на земли» Фонду Орлен.