Третє выданя маґазину «Одкрый Сандецкій Бескід» тепер інтерактивне

Мож уж придбати третє выданя туристичного маґазину «Одкрый Сандецкій Бескід». По річній перерві з причыны епідеміі, часопис вертат в новій формі. Як бесідуют шефредакторка чысла Зузанна Длуґош і директор проєкту Конрад Роґозіньскій, поставлено тым разом на інтерактивніст выданя, в інтернетовій версиі находило ся буде вельо мотузків до інчых сайтів, мап, туристичных аплікаций та віртуальных прогульок.

Найновше чысло «Одкрый Сандецкій Бескід» тыкат ся зимовых тем. Почытаме про інтересуючы місця на лыжы, сновборд ітп. Прирыхтуєме ся до гірской вандрівкы, дознаме ся, якы сут технічны новинкы в спортовым ґратю, а предовшыткым обізриме вельо прекрасных знимок з Сандецкого Бескіду, в тым тіж з вельох давнійшых лемківскых сел. Цілый маґазин тонькій не єст, бо має він аж 239 сторін, так єст што чытати!

Цілю маґазину «Одкрый Сандецкій Бескід» єст творити інтересуючый, свій зміст, основом котрого єст спілпраца з вынятковыма людми. Професийональна презентация Сандеччыны та західньой Лемковины то єдна з найважнійшых задач, якы має маґазин.

Творці хотят, будуючы марку «Одкрый Сандецкій Бескід», трафити до представників туристикы і шыроко понятого бізнесу. Як бесідує директор проєкту Конрад Роґозіньскій: «Хочеме трафити в смак чысленні прибываючых до нас туристів з барз ріжныма заінтересуванями. Ставляме на ріжнорідніст і высокій мериторичный рівен выдавництва. Не забываме тіж о жытелях реґіону, для них все стараме ся найти місце на сторонах маґазину».

Третій номер маґазину мож придбати дармо, входячы на сайт выдавництва: www.odkryjbeskid.pl. Там треба лем записати ся до нюслетера і в одповіди отримаме мотузок до цілого чысла з 239 сторонами. Вартат чытати! А як сме ся дознали, то в наступным, четвертым выданю «Одкрый Сандецкій Бескід» появлят ся тіж статі по лемківскы!