Церьков у Новім Саді стала конкатедралов

7-го януара 2019-го року, на праздник Рождества Ісуса Хріста за юліяньскым календарьом, выголосив владыка Ґеорґій (Джуджар), єпарха Ґрекокатолицькой єпархії св. Николая із центром у Руськім Керестурі на основі свого декрету Церьков свв. апостолів Петра і Павла у Новім Саді за конкатедралный собор.

Церьков у Новім Саді так стала першов по Катедралнім соборі св. Николая в Руськім Керестурі. Адміністрація єпархії, котра має на старости ґрекокатоликів у Сербії і Чорній Горі є як раз в Новім Саді, якый є і центром Войводиньской автономной области. Інформовала о тім аґентура Рутенпрес.

Мольме ся, жебы довіра до нас была оправдана

Єпарха выголосив підняв статус хараму почас архієрейской Божественной літурґії св. Василія Великого, котру з ним служыв у новій конкатедралі і новосадьскый парох Юліян Рац.

„Ціла Церьков, значіть і мы, святкуєме Рождество Хрістово, бо Бог послав Сына свого, жебы нас освободив од гріха, спасав і жебы сьме мали вічный жывот. Ісус приходить до нашых сердець, кедь го хочеме. І нам треба, жебы сьме собі заслужыли спасу і мір своїм жывотом,“ повів владыка почас проповіді на торжественнім богослужіню.

На кінцю літурґії містный парох подяковав владыкови Ґеорґійови і апеловав на віруючіх молити ся, жебы довіра, котра была дана парохії декретом о выголошіню містного храму за конкатедралный собор, была оправдана.

Нова єпархія св. Николая

Єпархія св. Николая є новов єпархійов, была выголошена лем 6-го децембра 2018-го року Папом римськым Франціском, котрый нову церьковну єдиніцю вытворив із бывшого Апостольского екзархату про Ґрекокатоликів у Сербії і Чорній Горі.

Апстольскый екзархат выникнув у 2003-ім році, по роспаді Югославії, коли быв вынятый із Крижевацькой ґрекокатолицькой єпархії. Крижевацька єпархія до 2001-го року мала під собов вшыткых ґрекокатоликів на теріторіях бывшой Югославії.

Од 2013-го року змінила ся назва екзархату на Апостольскый екзархат у Сербії. Катедралным собором од 2003-го року є Церьков св. Николая в Руськім Керестурі, котрый є і головным центром войводиньскых Русинів. Єпархія має 21 парохій і коло 22 тісяч віруючіх. Вірниками новой єпархії суть головно Русины, но мож меджі нима найти і Хорватів ці Румунів.

Жрідло фотоґрафі: Рутенпрес, ilovenovisad.com.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА