Церков в Квятони буде реконструувана

За портальом www.sacz.in інформуєме, што до листопада/новембра т.р. будут проходити консерваторскы роботы в лемківскій грекокатолицкій церкви св. Параскєвы в Квятони. В тым часі заплянувано роботы в олтарній части, де одновлений буде розпис стін і престола. Як пояснят пан Ваньо Гыра, опроваджаючий по квятоньскій церкви, при консервациі необхідным буде демонтувати части престола, як тіж дилины і повалу. Найважнійша задача, котра жде консерваторів – привернути тій части церквы давну красу. Золотые здобліня уж блякнуло або никнуло і треба покласти нове».

Квятоньска церков, датувана на другу пол. XVII ст., єст єдном з найкрасшых на обшыри цілой Карпатской Руси. Єст она знаменитым доказом куншту лемківскых теслів-артистів, а клясичны пропорциі і архітектонічна подоба выкликуют доднес зачудуваня. В 2013 р. довєдна з другыма памятками русиньской архітектуры была вписана до реґістру світовой спадковины UNESCO.