Церковны співы в Розділю

Зачала ся чергова едиция Співу з іконом в фоні, котрой найблизший концерт одбуде ся 8. липця/юлия т.р., в православній церкви Різдва Пресвятой Богородиці в Розділю. Є то цикль концертів, котрий буде проходил в забытковых храмах Низкого Бескіду.

Подібні як перше, і тот рік на концертах буде мож взріти мужскій камеральний церковний хор КЛІРОС під дириґентуром дяка Ярослава Ґрича. Складат ся він так з православных священників, як і світскых хористів. Пару днів тому мож было іх послухати м.ін. вчас концетру в Высові, котрий проходил в рамках циклю концертів Церковна музыка в Низкым Бескіді. Окрем домашнього хору, своі концерты давал тіж хор зо заходу Польщы (за тым мотузком пізрийте на коротку фотореляцию з выспуплінь в Ґорлциях).

Влонішні концерты проходили в другых лемківскых церквах. Хоц Розділя то лемківскє село, сам храм не мож зачыслити до традицийного лемківского стилю сакрального будівництва. Остал він перенесений в 1985 році зо села Середниця, находячого ся коло Устрик Нижніх. Церков Різдва Пресвятой Богородиці была побудувана в 1756 році, а на переломі ХІХ/ХХ ст. гідні розбудувана. Коли пришла Акция «Вісла», храм постепенно зачал попадати в руіну, а ратунком для него явила ся нагода перенести го на Лемковну до Розділя. Цілу інівиятиву підопрювал православний владыка перемышльско-новосандецкій Кыр Адам, котрий вєдно з Розділянами довершыл того, же днес церков служыт як дочырній храм парафіі св. Михала в Перегримці. Консекрация храму на Лемковині одбыла ся в серпни/авґусті 1986 рока. При церкви в 90. роках ХХ ст. добудувана был деревяна дзвінниця, композицийні вписуюча ся в архітектуру будівли. Істо, церков находит ся при кінци Розділя, поблизко границі з Вапенным. В Розділю, окрем реченой православной церкви, находит ся тіж мурувана грекокатолицка – днес служыт грекокатоликам та римокатоликам. Подібні як православна, свойом архітектуром тіж невельо вписує ся в канон лемківского стилю, што може покус чудувати, зато же остала побудува іщы в ХVIII ст., а пак розбудувана в 1927 році.