Церковны співы в Высові

В найблизшу пянтицю 12. серпня/авґуста, в лемківскій деревяній православній церкви св. Архангела Михала в Высові, другій раз в літнім періоді, вызвучыт церковний спів в рамках циклю концертів пн. Спів з іконом на фоні.

Церковны співы в тій церкви чути часто, зато же церков єст хоснувана наштоден як сакральний обєкт, але тым разом буде то окремий концерт церковной музыкы в выконаню Мужского Камерального Церковного Хору «Клірос» під дириґентуром Ярослава Ґрича, діючого при Єпархіяльным Осередку Православной Культуры «Елпіс» в Ґорлицях.

Цикль концертів пн. Спів з іконом на фоні уж од парох років проходит на Лемковині в просторах забытковых церкви Низкого Бескіду. Його орґанізатором єст православна парафія св. Тройці в Ґорлицях, при спертю Малопольского Воєвідства в рамках конкурсу оферт з туристикы пн. Гостинна Малопольща.

Концерты тогорічной едициі проходили уж в Ганчові, Розділю і, як отвераючий цикль концертів – в Высові. За каждым разом презентувал ся хор «Клірос».

Село Высова єст єдным з курортів на Лемковині, діючым од 1812 р., коли вознесено перший купельний здройовий будинок. Тепер в Высові находят ся великы санаторийны будинкы, діє вельо тзв. аґроґаздівок, єст здройовий парк, в якым доступны сут безплатно краны з мінеральном водом, сут тіж сакральны обєкты. Єдным з них єст православна церков св. Архангела Михала, яка побудувана была в 1779 році як грекокатолицкій храм. Вчас проведеной в 1910 році перебудовы была змінена з тридільной на дводільну. Поділ на три окремы части лишыл ся, што видно в єй брылі.

Над притвором возносит ся высока вежа о склесистых стінах, з навершником вежы. Олтарну част і храм вірных вкрывают шатровы, ламаны дахы. Вежу та дахы храму вірных і олтаря звінчают осмопольовы, бароковы вежычкы з цибулястыма банями і псевдолітарнями.

В середині церкви находит ся комплетний, богатий бароковий іконостас, як тіж бічны олтарі з іконами Непорочного Зачатя Божой Матери і Крещыня Христового в Йордані. Іконы на стінах представляют свв. Кірила і Методия, св. Ольгу і св. Владиміра. Стіны і повалу выполнят фіґуральна і рослинна поліхромія з кінця ХІХ ст.

В нижній части села находит ся деревяний римокатолицкій костел побудуваний подля універсального проєкту гірского деревяного храму авторства Здзіслава Монченьского (ідентичний храм вознесено в не так далекій Концльовій). Як то ся стало, же в селі побудувано костел в 20. роках ХІХ ст., хоц на тот част было гын лем пару римокатолицкых родин, можете дознати ся з обшырного допису про будову церкви на Горі Явір.