Ціну Пряшівского самосправного краю (ПСК) за 2020-ый рік дістануть академічный скулптор Штефан Коваль, лікарь Маріян Кріж і директор Вігорлатьской звіздарні Іґор Кудзей. Як в понедільок 19-го октобра 2020-го року інформовала пресаґентура TASR, комісія про удільованя публічных оцінінь ПСК выберала спомеджі 17-ох дорученых номінацій.
Депутаты ПСК ціну уділи директорови Вігорлатьской звіздарні в Гуменнім Іґорови Кудзейови за ціложывотне діло присвячене пропаґації астрономії і незамінительный вклад при зряджіню астрономічного комплексу европского значіня на Колоніцькім сідлі, котрый став центром позорованя, едукації і популарізації астрономії.
РНДр. Іґор Кудзей, к.н. (1957 р.) выштудовав наперед фізіку на Універзіті імени І. І. Мечникова в Одессі, пак на тій універзіті на Катедрі астрономії оборонив тітул кандідата фізікално-математічных наук.
Астрономічна обсерваторія на Колоніцькім сідлі находить ся на теріторії Парку темного неба меджі русиньскыма селами Колоніця і Ладомирів. Є деташовным робочім місцьом Вігорлатьской звіздарні. Якость колоніцького неба призначіла тоту обсерваторію ку здобываню высокоякостных науковых даных, як і ку популарізації і розвитку астротурістікы.
Вігорлатьска звіздраня там має своє деташоване робоче місце, звудоване, жебы выконовати фахову позоровательску діялность. Головным робочім апаратом є Вігорлатьскый народный телескоп – того часу найвекшый телескоп на Словакії. Так само є на Колоніцькім сідлі хоснованых дакілько далшых меншых апаратів.
Вручаня Цін Пряшівского самосправного краю одбуде ся 16-го децембра т. р. Окрім трьох лавреатів Ціны ПСК прибудуть і нагороджены Цінов председы ПСК, о котрых вырішыть жупан Мілан Маєрьскый.
На фотоґрафії: Обсерваторія на Колоніцькім сідлі, автор Ян Штовка.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі