Ціну Александра Павловіча здобыв Іван Боднар

В понедільок 20-го септембра 2022-го року в Братіславі одбыло ся удільованя Цін і Премій Літераторного фонду (Literárny fond) за оріґіналну творчость за 2021-ый рік.

Раз на два рокы Літературный фонд уділює так само Ціну і Премію Александра Павловіча за русиньску літературу. Якраз на тот рік припало оціньованя за період років 2020 і 2021. Як інформовав Літературный фонд, Премія тот рік уділена не была.

Ціну Александра Павловіча здобыв Іван Боднар за книжку під назвов Стары рущаньскы пригоды, котру выдало Обчаньске здружіня Колысочка у 2021-ім році з фінанчнов підтримков Фонду на підпору културы народностных меншын. Книжка позбераных історій од жытелів села Руське є збогачена ілустраціями Серґея Панчака.

Робота двоїх авторів

Як пише выдаватель у даній публікації, книжка Івана Боднара Стары рущаньскы пригоды взникла споїньом роботы двоїх авторів – Яна Боднара і його сына Івана Боднара.

„Ян Боднар, родак із Руського, заникнутого села про водну гать Старина в окресі Снина, записовав скоро дві десятьроча пригоды, котры ся стали жытелям Руського в минулости. Його сына Івана, котрый ся народив і до дорослости жыв в Снині, і до Руськго приходив на вакації, записаны пригоды з Руського так заінтересовали, же з няньком зачав довгорочны записы оформляти книжно. На жаль, отець ся выданя першой Івановой книжкы із Руського Спомины на валал під Бескідом в році 2020 уже не дожыв,“ пише выдаватель.

Книжка Стары рущаньскы пригоды, як інформує выдаватель, є продовжіньом пригод записаных Яном Боднаром, а умелецькы оформленых Іваном Боднаром.

Ціны і Премії Александра Павловіча

Літературный фонд уділює од 2005-го року літературну Ціну Александра Павловіча за найліпшый літературный твор написаный по русиньскы і Премії Александра Павловіча за літературный твор написаный по русиньскы і за тлумачіня літературного твору зо словацького на русиньскый язык.

Ціны і Премії Александра Павловіча суть все удільованы творам, котры вышли в попередніх двох роках. Ціну і Премії уділює комітет Секції про оріґіналну літературу на пропозіцію журі.

Два рокы тому Ціну Александра Павловіча за оріґіналный твор в русиньскім языку здобыла книжка Даніелы Капральовой з назвов Серна в нераю, котра вышла у 2018-ім році, і выдало єй так само Обчаньске здружіня Колысочка. Премію Александра Павловіча втогды здобыв поет Юрко Харитун із збірков поезії під назвов Моя тринадцята, котру выдала Академія Русиньской културы в Словацькій републіці у 2019-ім році.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА