Туга по моци

Віктор Орбан знова раз не дав позір на язык і повів дашто, што на Словакії выкликало бурю. Аж таку, же мадярьскый амабасадор мусив напоходовати на покровець перед міністра загранічных діл.

Контроверзны высловы мав Орбан на 32-ій літній універзіті Мадярів у Румунії. Орбан по вопросах з публікы крітіковав мадярьску меншыну на Словакії, же і кедь творить майже десять процент населіня, не знать собі забезпечіти свою участь в парламенті.

Означів то за слабый выкон, покля хоче хтось дашто зробити про свою отцюзнину в „одорваных частях країны“.

Лем про уточніня, і на припомянутя, тото є першый функчный період, коли мадярьска партія не є в парламенті. В минулости докінця нелем в народнім парламенті, але іщі і в европарламенті мала мадярьска партія свого депутата за Словакію.

Передчасны парламентны выборы будуть на Словакії на кінцю септембра, а подля різных бадань політічных преференцій то вызерать затля так, же в октобрі ся знова буде складати новый парламент без участи мадярьской партії.

Але вернийме до темы Орбана. На Вікторови Орбанови можеме крітіковати много. Але єдночасно суть і діла, котры мож оціньовати позітівно.

Є неспохыбнительным фактом, же условії, кторы суть днесь створены про народностны меншыны в Мадярьску, можеме в іншых країнах завидіти. А так само автор коментаря не бере за нич неґатівне, кедь ся премєр країны інтересує о свій народ поза граніці свойой країны.

А Віктор Орбан є днесь єден з малого множества голосів, котрый звертать увагу на проблемы народностных меншын на Україні, і кедь лем через прізму своїх – Мадярів. Тых неґатівных діл бы было омного веце.

Но што є в очах автора коментаря у Віктора Орбана нечітательне, то є факт, же властно мам важны похыбности о тім, ці сам Орбан знать, о што му іде.

Тот сам чоловік, котрый бісідує о тім, же треба укріпити співпрацу V4, як якогось муру обороны проти „злого“ Бурсела, і котрый інтеґріту V4 сам пошкодив уж веце раз, наприклад і в припаді войны на Україні, бісідує о своїм севернім сусідови, членови V4, членови Европской унії і НАТО, так само як і Мадярьско, як о одорваній теріторії.

Думам, же сам міг знати, же такым способом зо Словаками цімбор не буде. Но лемже тото є найвекшый гумор, а властно траґікомедія цілой нещастной румуньской історії.

Покля словацькый міністер загранічных діл покликав собі мадярьского амбасадора, покля демократічны партії – наліво і направо, высловили протест проти такых высловів, председа словацькых націоналістів Андрей Данко ся высловлює барз стримано.

Донбас, Крим все были історічны російскы теріторії, зато ся треба доїднати. Но на другім боці словацькы граніці суть святы.

Мусив то быти про нього шок, кедь з медій дізнав ся, што Орбан повів. Одколи была його SNS у владі вєдно із партійов Smer-SD а мадярьско-мултіетнічнов партійов Most-Híd, Данко веце раз повів, же треба мати добры односины з Мадярами, а докінця бісідовав, же має з Орбаном добры односины.

Жебы того не было мало, од сердця, щіро было мож з його уст чути і таке, як обдивлює Віктора Орбана, а кебы люди дали його націоналістам силный мандат, хотів быв рядити країну так, як його цімбор Віктор.

Што бісідує теперь Андрей Данко? На Орбана далше не дасть допустити. Самособов, мусив зробити тот повинный танець і повісти в медіях, же словацькы граніці суть „святы і непорушытельны“, а же Орбан бы мав роздумовати, што бісідує, і так далше. Але з його высловів было видіти, же щіры односины із своїм взором політікы то нияк важні не пошкодило.

Гей, было бы то лем гуморне, але обіцяв єм траґікомедію. Траґікомічность націоналістів тіпу Данко, але подобных найдеме і в далшых країнах, є в тім, же в припадах, якый теперь выстроїв Орбан, буде председа словацькых націоналістів бісідовати о святых граніцях. Але тот сам Данко бісідує, подобно як Орбан, же войну треба закінчіти діпломатічно.

Іде іщі дале. Бісідує о тім, же Донбас, Крим все были історічны російскы теріторії, зато ся треба доїднати. Но на другім боці, історічно мадярьскы теріторії Мадярьску бы не дав, бо словацькы граніці суть святы.

Што може капчати політіків як Віктор Орбан і Андрей Данко? Погляд на упорядкованя Европы по Першій світовій войні бізовно ніт. А предсі мають так близко ку собі.

Капчать їх єдине. Єднака туга по моци. Орбанови ся часточно наповнила, але од Путіна має іщі далеко, но а такы „данкове“ на Словакії і в іншых країнах бы хотіли холем тото, што має Орбан.

Што є про демокрацію „непрязне“, то факт, же наберають на силі, а каждыма выборами ся може сітуація обернути на їх бік. А така туга по моци, кедь ся дістане на посады, пак знать робити великы чуда…

Статя была написана як коментарь „Вступне до контроли“ лемківского радія lem.fm. Жрідло фотоґрафії: Wikipedia.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА