Голосник

Турістічный рух в ПСК в літніх місяцях ожыв. В дакотрых окресах чісла ліпшы як рік тому

Пандемія нового тіпу коронавірусу векшынов приносить планы вісти. Но в припаді турістічного руху в Пряшівскім самосправнім краї (ПСК) мож говорити в рамках літніх місяців о розвитку. Головно у домашніх навщівників.

„Наряджіня повязаны з пандемійов коронавірусу запричінили, же в юлі і авґусті того року евідумєме в Пряшівскім краю 650-тісяч переночовань домашніх навщівників, покля у 2019-ім році то было лем 600-тісяч. Наопак, чісло переночовань чуджінців было в літі 2020-го року лем 197-тісяч, покля минувшый рік то было аж 332-тісяч,“ інформовав Марек Гудак з Інштітуту розвитку Пряшівского самосправного краю.

Юл і авґуст майже єднакый як перед роком

Покля в місяцях апріль, май і юн того року турістічный рух значно заоставав за 2019-ым роком в кількости переночовань і чісла навщівників, юл і авґуст в ПСК досягли майже єднаку уровень як в попереднім році.

Кількость переночовань в юлі 2020-го року дістала ся на уровень майже 88 процент в порівнаню з попереднім роком, авґуст докінця быв аж на уровни 95-ох процент. Што до чісла навщівників, юл 2020-го року досягнув в порівнаню з попреднім роком понад 90-процентну уровень, і авґуст аж 99-процентну, кедь оцінюєме єднакы місяці в двох по собі ідучіх роках.

Дакотры окресы были на тім іщі ліпше

Як далше інформовав Марек Гудак, є інтересным, же аж у восьмых із тринадцятьох окресів ПСК было у місяцях юл і авґуст 2020-го року зазначене докінця высше чісло домашніх навщівників із Словакії, як перед роком. Ішло о окресы Гуменне, Кежмарок, Меджілабірці, Левоча, Попрад, Снина, Стропків і Свідник.

В шестьох окресах дішло докінця ку нароснутю кількости навщівників обще, значіть домашніх і загранічных вєдно, і то конкретно в Гуменнім, Кежмарку, Меджілабірцях, Снині, Стропкові і Свіднику.

„Полонины, Домаша і далшы турістічны дестінації ся такым способом тішыли почас тогорічного літа векшому інтересу, як то было почас літніх місяців у попередніх роках,“ закінчів Гудак.

Жрідло фотоґрафії: www.sopsr.sk.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі