Тырват ремонт грекокатолицкой катедры в Рускым Керестурі

Тырват ремонт грекокатолицкой катедры в Рускым Керестурі і буде він выдолжений – доносит аґентура Рутенпрес. Як аґентуру повідомил парох церкви св. Миколая – роботы вымагают додатковых фінансовых фондів. Ремонт обнимат зовнишню част храму. Перше неточно были обрахуваны сумаричны кошты ремотну, зато і тепер ся они звекшыли. Отже, вказали ся дальшы недостаткы, котры вымагают выміны або реконструкциі, прим. погниты двері, ци рішене выконаня вентиляциі до крипт, де лежат владыкы тамтышньой єпархіі. Фінансову підпору ремонту грекокатолицкой катедры забезпечуют вірны керестурской парохіі, ай і дальшы даткы, так як і підпора зо стороны сербской державы. З причыны актуальных недостатків вымаганого фонду, парохія выступила до одповідніх ґрантовых інституций, жебы мож докінчыти комплексову реставрацию.

Грекокатолицка русиньска катедра

Храм был побудуваний в 1784 році, а дальше церков была одновлена в 1836 році, о чым засвідчат інскрипция над пілнічным портальом. Церков в Рускым Керестурі є днес центром Грекокатолицкого Апостольского Еґзархату Сербіі, а як будинок є узнаний за забыток культуры о великым значыню. Катедра є посвячена Перенесіню Мощів Святого Отця Миколая і презентує клясицистичний стиль сакрального будівництва. Істория апостольского еґзархату сігат початків ХХ ст., коли в 2011 р. папа Йоан Павел II выділил з крижевацкой єпархіі апостольскій еґзархат в Македоніі, а пак 28. серпня/авґуста 2003 р. Апостольскій Еґзархат Сербіі і Чорногоры (змінений в 2013 р. на Апостольскій Еґзархат Сербіі). Рускій Керестур як місто в Войводині являт ся прото не лем культурным, але і духовым центром Русинів в Сербіі. Так само вірны еґзархату то в великым чыслі Русины. Згідно зо статистиком Католицкой Церкви, чысло вірных еґзархату на 2014 рік то кус понад 22 тис. осіб. Еґзархат рахувал на тамтот час 21 священників і 21 парохій. Апостольскым Еґзархом од моменту выділіня еґзархату як окремой адміністрацийной єдиниці єст єпископ Дюра Джуджар (родж. в 1954 р. в русиньскым селі Дюрдів на Бачваньскій Руси).

фот. Вікіпедия