typopo і по русиньскы

Молодый ґрафік і дізайнер Браньо Шандала зо Свідника вже не є в русиньскім середовиску цалком незнамый. Свойов роботов брав участь на дакілько русиньскых проєктах. Зробив дізайн вебсайтовой сторінкы і ґрафічных выступів цілого Русиньского фестівалу у Свіднику, котрый того року орґанізує ся вже по пятый раз, є автором ґрафікы буклетів про авдіодіскы з русиньскыма приповідками, котры од року 2014 выдавать орґанізація молоды.Русины, про свою маму, русиньску писательку Людмилу Шандалову, робив ілустрації, вязаня і тіпоґрафію про книжкы Подите, дїти, што вам повім і Червеный берег.

На інтернетовім сайті аґентуры tota agentura, котра выдавала і дві спомянуты книжкы, перед часом Браньо Шандала спустив і інштрумент під назвов translit, котрый служыть на транслітерацію русиньскых текстів в азбуці до латинікы і навспак – з латинікы до азбукы (за правилами діакрітікы хоснованой на Словакії). Теперь приходить з новым онлайновым інштрументом під назвов typopo“ (чітай тіпопо), котрый оправлює тіпоґрафічны хыбы в штирьох языках. А не бракує ани тот наш – русиньскый.

Як повів Свідничан про Designportal.cz, „typopo“ одстранює надмірны павзы в тексті, неправилно хоснованы лабкы, апострофы, тіре, придавать неділительны павзы там, де суть потрібны, і проґрам знать робити і дакілько далшых управ. „Актуално підпорює штири языкы (анґліцькый, словацькый, чеськый і русиньскый), і реґуларно розшырюю множину хыб, котры проґрам знає ідентіфіковати і оправити,“ повів про портал чеськый дізайнерьскый портал Шандала.

Браньо Шандала є абсолвентом Масаріковой універзіты в Бырні, Чеська републіка.  Його онлайновый інштрумент typopo можете так як і translit найти на сайті tota agentura за тым мотузком. Є к діспозіції бесплатно. Може ся придасть і вам коло робліня текстів про книжкы, блоґы, ці іншы писемны матеріалы.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА