У Вігорлатьскім музею припомянуть собі Добряньского

В просторах Вігорлатьского музею рихтують наукову конференцію під назвов Заповідь Адолфа Івановіча Добряньского про сучасность, котра ся одбуде в рамках тридньовых споминковых святковань присвяченых 200-ій річніці народжіня того вызначного русиньского будителя. Подія буде проходити в рамках Днів европской културной дідовизны 2017. Інформує о тім Яна Федічова з Вігорлатьского музею.

Події на веце місцях

Вігорлатьскый музей в Гуменнім вєдно із далшыма співорґанізаторами в днях 1-го аж 3-го септембра орґанізує вже другый річник подій присвяченых юбілею Добряньского.  Заповідь Адолфа Івановіча Добряньского про сучасность є тот рік тридньовым проґрамом з културно-сполоченьскыма подіями і лекціями.

Тогорічный проґрам зачне 1-го септембра святочнов літурґійов в Православнім катедралнім соборі свв. Кіріла і Мефтодія в Михалівцях і стрічов коло памятника Адолфа Добряньского в Михалівцях. Подобны публічны події одбудуть ся в днях 2-го і 3-го септембра в Меджілабірцях, в селі Рудльов, де ся Добряньскый народив і в Чертіжнім, де є похороненый.

Музей буде мати конференцію

Частьов проґраму, на котрім взяв участь і Вігорлатьскый музей в Гуменнім буде наукова конференція в просторах музею, котра ся 1-го септембра зачне о 14.00 год.  Наукова конференція буде присвячена заповіді Добряньского в соціо-културных контекстах свойой епохы зо заміряньом на теолоґічно-културный аспект і народно-господарьскы, політічны і народностны актівности вызначной особности русиньской історії.

В рамках проґраму конференції приговорять ся участным проф. ТгДр. Ян Шафін, ПгД., декан Православной богословской факулты Пряшівской універзіты в Пряшові, Мґр. Мілан Ясик, парох ґрекокатолицькой парохії в Ольці і член Общества св. Йоана Крестителя, Доц. ПгДр. Андрій Антоняк, к. н., Мґр. Александер Онуфряк, ПгД. із Катедры політолоґії Філозофічной факулты Універзіты Павла Йозефа Шафарика в Кошыцях, Др. Маріянма Лявинець із Мадярьска, членка історічной комісії Світового конресу Русинів і Доц. ПгДр. Іван Мырва, к. н., директор Словацького історічного інштітуту Матиці словацькой.

Споминковы події суть орґанізованы в співпраці із Русиньскым здружіньом інтересів, Матицьов словацьков, Обществом св. Йоана Крестителя, містами Михалівці, Гуменне і Меджілабірці, селами Рудльов і Чертіжне, Православнов богословсков факултов Пряшівской універзіты, Катедров політолоґії Універзіты Павла Йозефа Шафарика в Кошыцях, Русиньсков обродов на Словеньску і Світовым конґресом Русинів. Детайлный проґрам вшыткых споминковых подій можете найти долов на плаґатах.

Рік Адолфа Добряньского

Округлый стіл Русинів Словеньска (ОСРС) выголосив рік 2017 за Рік Адолфа Добряньского. Тот юбілей быв выголошеный із нагоды 200-ой річніці од народжіня того вызначного русиньского будителя і політічного діятеля. В рамках юбілейного року ОСРС апеловав на русиньскы орґанізації, котры діють на Словакії, жебы присвятили свої події як раз Добряньскогому і його округлій річніці. Од зачатку рока вже проходило дакілько подій, котры были юбілею присвячены. Того року быв юбілейному року прсвяченый і День Русинів Словакії, котрый орґанізовала Русиньска оброда на Словеньску вєдно із далшыма русиньскыма орґанізаціями, котры о співпрацу проявили інтерес.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА