В звязку зо скорым розповсюдажньом ся коронавіруса в середу, 25. марця 2020 р., Уряд Міністрів Украіны принял рішыня ввести режім надзвычайной ситуациі і продолжыти повселюдну кварантанну в цілій державі.
Режім надзвычайной ситуациі то специяльный тымчасовый юридичный режім. Може быти введеный подля украіньского законодавства як раз в припаді епідеміі.
Ограничыня на місяц
Про введіня такого стану повідомил премєр Украіны – Денис Шмыгаль. «Режім надзвычайной ситуациі плянує ся ввести на 30 днів. Одповідньо, кварантанну тіж плянуєме продолжыти на 30 днів» – бесідувал. Тым самым режім і цілодержавна кварантанна обовязуют покля што до 24. квітня/апріля. Премєр заявил тіж, же кєд Украіна зможе скорше побороти пандемію, так режім буде знятый перед заявленом датом.
Як підчеркнул Шмыгаль, введеный режім надзвычайной ситуациі не єст тым самым што надзвычайный стан, котрый єст окремом юридичном катеґорийом. Надзвычайный стан може ввести Верховна Рада по поданю через Президента, а як іде о режім, то старчыт, же оголосит го Уряд Міністрів.
Обєкты, в котрых будут ведены досліджыня на присутніст Covid-19, місця госпіталізациі ци місця кварантанны мают быти хоронены через поліцию і войско.
Як пояснил украіньскій уряд, проголошыня такого режіму передвидує, што м.ін. украіньскы власти, а предовшыткым службы цивільной обороны, будут робити подля специяльных, зміцненых процедур. Премєр заявил тіж, што нова ситуация не означат ограничыня громадяньскых прав ани інґеруваня в приватны бізнесы. Інакше было бы в припаді введіня надзвычайного стану.
На Підкарпатю покля што брак зараженых коронавірусом
В звязку з тым, што режім надзвычайной ситуациі обовязує на обшыри цілой украіньской державы, обовязує і на Підкарпатскій Руси. Подібні як в примірі Польщы і Словациі, приграничны переходы медже Підкарпатьом а Пряшівском Русю сут уж цілковито закрыты для подорожуючых. Є єднак іщы пару вынятків, прото уряд плянує до пятниці, 27. марця, ограничыти пасажерскій рух через границю в обі страны. «То необхідне, понеже видиме, што в послідніх тыжнях єдиным джерелом прониканя коронавіруса в Украіну были приізды громадян з заграниці, і тото вшытко фурт тырват» – додал Шмыгаль.
Покля што в закарпатскій области не потверджено припадку коронавіруса. 23. марця проведено в Мукачеві першый тест на присутніст Covid-19 в єдной громадянкы. Подля інформаций з 25. марця, в цілій Украіні здіаґнозувано 145 припадків коронавіруса. Центр Громадского Здоровля в опубликуваній інформациі не вычыслил потвердженого припадку коронавіруса на Підкарпатю. Подля доступных джерел, причыном може быти долгій час жданя на офіцияльны результаты досліджынь з Кыйова, што середньо тырват аж три дни. Порталь www.zakarpattya.net.ua писал 23. марця, што результат аналізы был позитивный.
Коментарі