Україна і Словакія обговорили переспектівы споїня маґістралов D1

Як інформовав портал Новини Закарпаття, недавно в Закарпатьскій областній адміністрації зорґанізовали онлайн стрічу з колеґами із словацького боку. На стрічі занимали ся перспектівами споїня Україны і Словакії автомаґістралов D1.

Автострада D1 є найвызначнішов і єдночасно найдовшов словацьков автострадов, котра має по своїм докінчіню споїти Братіславу із Загором коло державной граніці з Українов. Частьов автострады має быти і новый автострадовый гранічный переход.

Часть паневропского корідору

Траса D1 зачінать в Братіславі і продовжує через Тырнаву, Тренчін, Жіліну, Мартін, Попрад, Пряшів, Кошыці і Михалівці аж до Загору. Тота автострада є частьов голузкы „А“ 5-го паневропского корідору з трасов з Братіславы через Ужгород аж до Львова.

Натеперь будованя маґістралы, котра має надзвычайно высокый соціално-економічный потенціал про обидві державы, заставило ся за Кошыцями, в Бідовцях, што є менше як 80 км од граніці з Українов. Окрім того іщі не суть добудованы ани дакотры части на Словакії.

Почас онлайн стрічі обідви стороны были згодны, же є важным надвязати співпрацу і вырішыти, в якім напрямі до державной граніці з Українов дале будовати тоту маґістралу. Про Закарпатьску область Україны суть актуалныма і перпсектівныма пунктами переходу Паладь Комарівці – Руське і Соломоново – Чієрна, де вже зачало ся робити на выділіню фундушів. Іщі все рахує ся і з переходом Ужгород – Вышнє Німецьке, де Словакія планує збудовати новый темрінал про транспорт товарів.

Планована далша стріча

Далша стріча в такім самім форматі, як інформовав україньскый портал, бы мала одбыти ся за дашто веце як місяць.

„За тот час выпрацуєме пропозіції про словацькых колеґів што до напрямів продовжіня автомаґістралы до словацько-україньской граніці, ініціюєме зорґанізованя засіданя україньско-словацькой меджівладной комісії в найблизшім часі, стрітиме ся з веджіньом державы, народныма депутатами, жебы здобыти їх підпору. Бо мы вшыткы маєме намагу, жебы пригранічна інфраштруктура на Закарпатю была на европскій уровни,“ повів першый заступник головы Закарпатьской областной адміністрації Мірослав Білецькый.

Жрідло фотоґрафії: Новини Закарпаття.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА