Улиця св. Владиміра Великого в Креници

Як подає офіциялньний сайт ПАПЦ orthodox.pl, 28. липця т.р., вчас святкувань 1000. річниці смерти св. Владиміра Великого в Креници, ведуча містецкой рады в Креници одчытала постанову, котра змінят теперішню назву улиці при котрій находит ся православна церков св. Владиміра Великого з ул. Цментарной на ул. св. Владиміра Великого.

О зміну назвы той улиці од парох років внескували владыка Паісій враз з настоятельом і парафіянами креницкой парафіі.

Парафія св. Владиміра Великого в Креници была ериґувана декретом митрополиты Василия 1. червця 1981 р. Церков остала воснесена в роках 1983-1996, посвячена 8. вересня 1996 р. в чест св. Владиміра, Крестителя Руси. Храм свойом архітектуром, хоц модерном, має навязувати до тридільных лемківскых церкви.

Першым парохом в Креници был о. митрат Василь Ґалчык (спілпрацовник радия лем.фм, автор проґраму “Церковна гомілетыка”), а од 2006 р. креницкых православных вірных веде о. прот. Петро Пупчык. Од моменту основаня парафіі дяком і дириґентом церковного хору єст Петро Трохановскій.

Креницка парафія єст єдном з невельох в Польщы, в якій декотры фраґменты Службы Божой (св. Євангелия і Апостол) чытаны сут в лемківскым языку. В церкви находит ся таблиця, написана в лемківскым языку, інформуюча о вознесіню храму в роках 1983-1996.

A за тым мотузком запрашаме до обізріня інтернетового сайту креницкой православной парафіі св. Рівноапостольного Князя Владиміра.