Голосник

Умер Йоан Гірка, емерітный пряшівскый ґрекокатолицькый єпарха

Пряшів, 10. апріля 2014

Днесь умер у віку 90 років жывота владыка Йоан Гірка, емерітный пряшівскый ґрекокатолицькый єпарха.

Йоан Гірка народив ся в селі Абрановці, пряшівского окресу, дня 16. новембра 1923 р. Штудовав на Высокій школі богословскій в Пряшові, пізніше одийшов на штудії на Теолоґічну факулту Карловой універзіты в Празі. За священика быв высвяченый блаженым владыком Васильом (Гопком) дня 31. юна 1959 р. В роках 1949 – 1950 быв капланом в парафії Лютина. В 1950 році по насилной ліквідації Ґрекокатолицькой церькви не є в пасторації і робить як робітник на ставбі в Тренчіні. В 1952 році є одсудженый на три рокы арешту. По амнестії робив як робітник в Брезні. В році 1955 є знова одсудженый Найвысшым судом в Празі на два і пів рока арешту і примусовы роботы в угольных копалнях в Ртыні і Підкрконошу (Чехія). На свободу ся дістав в році 1958 і зачав робити як робітник в Брезні. По обнові Ґрекокатолицькой церькви в 1968 році ся ставать парохом і деканом в Пряшові. Пізніше, в тім самім році є менованый папом Павлом VI. за адміністратора Ґрекокатолицькой пряшівской єпархії. Державну згоду на діяня в тій функції здобыв аж в році 1969. В 1978 р. є менованый за папского прелата. За ґрекокатолицького єпарху є менованый аж по револуції, дня 21. децембра 1989 року. Єпіскопскы свячіня дістав 17. фебруара 1990 од Йозефа кардінала Томка в Пряшові. Дня 11. децембра 2002 р. ся став емерітным єпіскопом і жыв дале в Пряшові – Соливарі.

Вічная память!

Жрідло: TK KBS

Протлумачів: Петро Медвідь

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі