UNESCO: Освіта в материньскім языку підтримує учіня

21-го фебруара святкує ся Меджінародный день материньского языка, котрый выголосила 30-та ґенерална конференція Орґанізації зъєдиненых народів про освіту, науку і културу (UNESCO) в новембрі 1999-го року, і од року 2000 собі го реґуларно припоминать цілый світ.

Історія выникнутя того дня сягать до 1952-го року, коли уряды в области днешного Банґладеша намагали ся одсторонити бенґалскый язык, якый быв меншыновым языком в области, і вычеряти го за урдьскый язык.

Почас протестів на універзіті в місті Дака, днесь столиця Банґладешской народной републікы, передтым Пакістан, застрілила поліція 21-го фебруара 1952-го року штирьох штудентів. З цільом заховати память на них быв выголошеный Меджінародный день материньского языка.

Вална громада Орґанізації зъєдиненых народів вызвала членьскы державы, „жебы підтримовали захованя і охрану вшыткых языків хоснованых народами світа“. Подля фаховців в сучасности бісідує ся понад 7100 языками, но приблизно 40 процент з них є огроженых.

„Языкова розмаїтость є штораз веце огрожена, кедьже все веце языків заникать,“ варує на своїй вебсторінці UNESCO, і вказує на факт, же „цілосвітово 40 процент популації не має приступ ку освіті в языку, котрым бісідує або котрому розуміє“.

Вшыткы крокы на підпору шыріня материньского языка помагають нелем розвивати языкову розмаїтость і вецеязычну освіту, але і розвивати усвідомліня о языковых і културных традіціях на цілім світі, а єдночасно діють іншпіратівно в повязаню із солідарностьов, яка є основана на порозумліню, толеранції і діалоґу, пише ся ку Меджінародному дню материньского языка.

Вецеязычна освіта є стовпом меджіґенерачного учіня – то тема тогорічных святковань Меджінародного дня материньского языка. „Освіта в материньскім языку підтримує учіня, ґрамотность і освоїня собі далшых языків,“ припоминать в повязаню із святом UNESCO.

Фото: ОЗ Колысочка.