Упамятніня в долині Сочы

Станіслав Карчевскій, маршалок сенату Польской Республикы, в словеньскым місті Нова Ґориця, в четвер, 22 марця 2018 р. на горі Саботин одкрыл памятник присвячений польскым воякам погыбшым вчас великых боів над ріком Сочом (Isonzo). В подіі взяли тіж участ предсідатель высшой ізбы словеньского парляменту Алойз Ковшца і градоначальник Новой Ґориці Матей Арчон. Маршалок підкрислил, што в тым місци «видно траґедию солдатів, якы не мали свойой державы». З польскых земель рекруты сформуваны в 30. полку австрийскых пішых ішли на фронт, жебы бороти ся за «вашу і нашу свободу».

Вчас Великой Войны, од мая 1915 р. до листопада 1917 р. в Юлийскых Альпах проходили великы боі на тзв. італияньскым фронті. В австрийско-мадярскій арміі в тым часі, окрем польскых солдатів, мобілізуваны были тисячы вояків русиньского походжыня родом з Лемковины і з Пряшівщыны. Вельо з них стратило жытя, або было раненыма в долині Сочы, в Ґорици, Кобаріді (Caporetto) і другых місцях. Зато і про них споминал маршалок Карчевскій, коли в промові повіл – «Гев, в долині рікы Сочы, сплітат ся траґічна доля вельох наций лишеных свойой державы. Тоты болячы скушености лучат нас вшыткых і вписуют ся во спільну істроичну памят той части Европы».

Зазначыл, што днес Польща і Словенія приналежат до Евросоюза і днес «воякы не мусят быти посыланы, жебы воювати, жебы гынути на чужых фронтах».

Дале Станіслав Керчевскій повіл «Інча думка, котра приходит мі до головы над гробами солдатів, тыкат ся патріотизму. Днес, коли будуєме европейску спільноту суверенных держав, памятайме, што фондаментом той спільноты, яка має боронити каждого єй члена, єст солідарніст, пошануваня достоменности і респект для вшыткых народів великых і малых. То лекция вынесена з двох світовых воєн. Отже, поклонме головы перед героями, котры дотримали присягы до кінця, але вытягнийме тіж внескы з іх траґічной долі».