Голосник

Уповномоченый про народностны меншыны стрітив ся з членами словацькой влады

Хоць од марца має Словакія новый владный кабінет, котрый веде премєр Іґор Матовіч, влада натеперь не рішыла даяков змінов вопрос упвономоченого про народностны меншыны, і на тій посаді зістав Ласло Буковскый, якый быв номінованый іщі по парламентных вольбах у 2016-ім році.

Уповномоченый і далше наповно выконує свою функцію, о чім свідчіть і то, же в остатніх днях абсолвовав робочі стрічі з членами влады Словацькой републікы, як інформовав його офіціалный сайт.

Стріча з міністерков справедливости

Буковскый ся в тыждні од 18-го до 24-го мая 2020-го року стрітив такой з двома міністерками. Зачатком тыждня обговорив проблематіку з міністерков справедливости Марійов Коликовов.

„Головнов темов робочой стрічі была далша взаємна співпраца, котра бы мала надвязати на попередній період, і далшый поступ приготовліня закона о народностных меншынах в смыслі Проґрамового выголошіня влады Словацькой републікы,“ інформовав сайт уповномоченого.

Влада Іґора Матовіча ся завязала прияти споминаный закон. Шеф резорту справедливости є навеце все і председом Рады влады Словацькой републікы про людьскы права, народностны меншыны і родову рівность, котрой порадным орґаном є Выбор про народностны меншыны і етнічны ґрупы, якомый зясь веде уповномоченый про меншыны.

Їднаня в конштруктівнім дусі

В пятніцю 22-го мая уповномоченый в просторах міністерства стрітив ся з міністерков културы Наталійов Мілановов. Обидві стороны мали почас їднаня підкреслити важну роль обидвох інштітуцій при охороні і розвитку културы і ідентічности народностных меншын на Словакії.

Договорили ся, же уповномоченый і його уряд будуть актівно брати участь на окремых конкретных задачах, котры выходять із Проґрамового выголошіня влады Словацькой републікы. Буковскый на робочій стрічі окрім іншого підкреслив і важность існованя Фонду на підпору културы народностных меншын, народностных музеїв, як і планованый розвиток народностного высыланя у верейноправнім телерадію RTVS.

При конштруктівнім їднаню ся так само одкрыв і вопрос браня до увагы коекзістенції державного языка і меншыновых языків при їх вжываню.

„Я радый, же маю за собов першы їднаня, котры ся вели в конштруктівнім дусі. В близкій будучности суть напланован далшы стрічі з членами влады Словацькой републікы, котры в меншыновій політіці грають ключову роль,“ повів Буковскый по своїх першых їднанях з новыма членами влады.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫК

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі