Голосник

Уповномоченый зо шефом діпломації бісідовали о меншыновім законі

Уповномоченый влады Словацькой републікы про народностны меншыны Ласло Буковскый у віторок 13-го октобра 2020-го року в просторах Міністества загранічных діл і европскых справ стрітив ся зо шефом словацькой діпломації Іваном Корчоком.

Інформовав о тім офіціалный сайт уповномоченого. Стріча была продовжіньом серії їднань з членами влады Словацькой републікы ку актуалным вызвам і задачам в области меншыновой політікы державы.

Бісідовали о меншыновім законі

Почас їднаня пріорітно занимали ся повніньом Проґрамового выголошіня влады, конкретно приправов закона о народностных меншынах. Уповномоченый приближыв міністрови Корчокови процес творіня будучого закона, котрый має рефлектовати актуалны вызвы і припомінкы народностных меншын.

Буковскый і Корчок были згодны в тім, же закон має выходити з добрых европскых прикладів, но мусить быти і в згоді з конштітуційов а меджінародныма документами, і обовязками Словацькой републікы.

Так само занимали ся дакотрыма задачами, котры выходять із заключінь Змішаной словацько-мадярьской комісії про справы меншын з минувшого року.

Уповномоченый на їднаню ініціовав зліпшіня сполочного поступу при аплікачній практіці меншыновых языковых прав у згоді з Хартов реґіоналных або меншыновых языків, як і приправу інформачных матеріалів як про хоснователів, так і про повинны субєкты.

Влада ся завязала прияти закон

Владный кабінет премєра Іґора Матовіча прияла своє Проґрамове выголошіня влады 19-го апріля того року.

В документі ся влада завязала, же прийме закон о поставліню народностных меншын „як єдно із средств спомаліня асімілації членів народностных меншын і ґаранцію уплатньованя меншыновых прав выходячіх з Конштітуції Словацькой републікы. Закон буде управльовати поставліня народностных меншын і дослідно апліковати і прецізовати їх права ґарантованы Конштітуційов Словацькой републікы.“

Окрім того влада у выголошіню споминать, же буде роздумовати о можливости зряджіня Уряду про народностны меншыны, жебы дати можливость хосновати членам народностных меншын конштітучне право брати участь на рішіню справ публічных.

Приготовліньом меншынового закона быв на владі повіреный якраз міністер Іван Корчок і його резорт діпломації Словацькой републікы. О то, жебы влада прияла меншыновый закон жадав і Выбор про народностны меншыны і етнічны ґрупы Рады влады Словацькой републікы ро людьскы права, народностны меншыны і родову рівность. Членове выбору схвалили і леґіслатівный замір такого закона, котрый быв приготвльованый іщі за бывшой влады.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі