В Братіславі проходить выстава книжок і часописів про діти і молодеж народностных меншын

BIBIANA – Меджінародный дім уменя про діти, приготовила од 24-го марца до 24-го апріля 2022-го року в Ґалерії Душана Ролла в Братіславі выставу книжок і часописів про діти і молодеж народностных меншын, котры жыють на Словакії, під назвов #slovo#jazyk#kniha (#слово#язык#книга).

Як інформовав за орґанізатора Юрай Шебеста, выстава є малым „святкованьом“ Меджінародного дня материньского языка, котрый є 21-го фебруара, і Меджінардного дня книгы про діти, якый ся припоминать 2-го апріля.

Ку тринадцятьом народностным меншынам, котры суть признаны на Словакії, орґанізатор придав і вєтнамску меншыну, котра дотеперь на Словакії офіціалный статус меншыны не має.

„Выставов #slovo#jazyk#kniha мы вырішыли презентовати і підпорити творчость про діти і молодеж народностных меншын, котрой цільом є припомянути, спознавати, сохраняти і розвивати материньскы языкы як дідовизну предків, цінну часть ідентічности,“ інформовав Шебеста.

На выставі мож видіти образковы книжкы, повісті, книжкы про молодеж, приповідкы ці лепорела з продукції властных выдавництв народностных меншын, далшы з книжковых фондів, котры собі меншыны будують з книг привезеных з матерьскых держав, або їх перекладів до словацького языка. Діти чекають і різны гры як пексесо ці омальованкы.

Выстава збогачена є о книжкы з фонду бібліотекы, яку має BIBIANA, в котрій найдеме цінны тітулы з цілого світа, якы здобыли різны меджінародны нагороды за авторьскы ці ілустрачны обробліня.

„Хоць суть книжкы писаны в різных языках, мають много сполочного – в каждій приповідці справедливость все переможе, зло є покаране, правда наконець вкаже ся, і добрых всядыль много змістить ся,“ додав за орґанізатора Юрай Шебеста.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА