В чест Будителя

В місци народжыня Александра Духновича, в селі Тополя дня 25. квітня 2015 р. одкрыто пропамятну таблицю посвячену будительови Русинів і творцьови русиньского гымну.

Ініцияторами і фондаторами упамятніня были Світовий Конґрес Русинів, Крайове Товариство Підкарпатскых Русинів і Сельскій Уряд в Тополи. В ден торжества одслужено Св. Літургію в тамтышній грекокатолицкій деревяній церкви, промавлял Владимір Противняк – секретар Світовой Рады Русинів, а пак остала одкрыта сама таблиця, по чым одбыл ся культурний проґрам. На памятку акциі, недалеко таблиці посаджено символічне дерево.

Пониже презентуєме фотоґрафіі з торжества, удоступнены през секретаря СРР, котрых автором є Іван Чіжмарь.