В селі Чірч в окресі Стара Любовня передали в середу 20-го новембра 2019-го року до хоснованя нову матерьску школу. Інформовала о тім пресова аґентура TASR.
Реконштрукційов і приставбов ку старій, майже 40-річній будову, подарило ся звекшыти капаціту матерьской школы з 21 на 46 дітей. Село є вже теперь приготовлене на новы правила, кедьже од 1-го януара 2021-го року на Словакії будуть діти обобязково ходити до матерьской школы од 5-ох років.
Ниґда порядну не мали
„В Чірчі ниґда не была порядна матеьркса школа, все то было лем в провізорнім домі. Думам, же нашы діти, а головно родічі будуть спокійны, кедьже вже теперь сьме приготовлены на новы правила. Вытворили сьме і єдно нове робоче місце,“ цітовала аґентура старосту.
Тот рік ходить до матерьской школы в Чірчі 40 дітей. На выбудованя дістало село фінанчну дотацію в сумі 320 тісяч евр з Уряду уповномоченого влады Словацькой републікы про ромскы комуніты, кедьже в селі жыє і тота народностна меншына. Цілковы вытрати были коло 340 тісяч. Уповномоченый про ромскы комуніты Абел Равас быв і на святочнім одкрытю школы.
Збудовали за штири місяці
Матерьска школа є одкрыта про дітей од 21-го новембра. Будову затеплили, чім бы ся мало шпоровати на енерґіях. В ареалі прибыли новы пішникы і плот.
Чірч нову матерьску школу стигнув за рекордно короткый час. Будовали єй лем штири місяці. Роботы на ставбі реалізовала сельска фірма Солиско Чірч, котра давать роботу 23-ом людям зо села. Фірма такой пустила ся до далшой ставбы. В Чірчі будують комунітный центер. Тот дасть роботу далшым штирьом людям зо села.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі