В Давідові посвятили Памятну ізбу Василя Гопка

В неділю 21-го мая 2023-го року проходив у ґрекокатолицькій парохії в селі Давідів одпуст з нагоды праздника Вознесенія Господа, на корый прияв позваня владыка Петро Руснак, аспостольскый адміністратор Пряшівской архієпархії і братіславскый єпарха.

Одпуст буыв збогаченый о посвячіня будовы бывшой фары, в котрій одкрыли Памятну ізбу Василя Гопка, балеженого священомученика, якый быв помічным єпіскопом втогдышньой Пряшівской єпархії. Будову посвятив владыка Петро, котрый быв і головным служытельом торжественной літурґії.

Будинок, в котрім теперь находить ся памятна ізба, быв наперед ґрекокатолицьков народнов школов, а пізніше служыв як парохіалный уряд. Якраз тота будова была свідком великых моментів церькви, насилного одведжіня священика Юрія Буйняка державныма властями у 1951-ім році, коли уж была церьков ілеґална, але і його навернутя по обновліню Ґрекокатольцкой церькви у втогдышній Чехословакії в 1968-ім році.

За часів, коли в Давідові быв душпастырьом отець Буйняк, часто там приходив священомученик Василь. В памятній ізбі, в котрій часто перебывав, находять ся оріґіналны артефакты з його жывота, писемности, фотоґрафії, його єпіскопскы різы, вязеньскый мундур, крест подарованый його родаками, але і іншы цінны артефакты.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА