В Гуменнім святочно одкрыли зреконштруованый каштель

В Гуменнім у віторок 21-го юна 2022-го року святочно одкрыли обновленый каштель. Як інформовала Леа Геілова, із Одділіня комунікації і пропаґації Пряшівского самосправного краю (ПСК), по фіналізації ІІ. і ІІІ. етапы завершыла ся його комплетна реконштрукція.

За 2,37 міліона евр обновила жупа ренесанчный каштель, в котрім має свої просторы Вігорлатьскый музей, з тым, же ся обновила внутрішня фасада і зреконштруовав двір.

Обновлена історічна домінанта

„Я барз радый, же ся нам подарило докінчіти комплексну реконштрукцію Вігорлатьского музея в Гуменнім, котрый належыть ку найвекшым културным тяглам на Земпліні. На тоту обнову сьме врамках ІІ. і ІІІ. етапы, котры безпосередно надвязовали на себе, а часточно проходили і в єднакім часі, дали із властных джерел немалы фінанчны средства, конкретно 1,73 міліона евр. Далшых понад 643-тісяч дало Міністертво културы з проґраму Обнов собі свій дім, решту дофінанцовав музей,“ пояснив председа ПСК Мілан Маєрьскый.

За його словами то точка за великов інвестічнов акційов, котров реґіон і цілый край здобыв домінантну історічну памятку, котра буде служыти людям на културны події, і навщівникам музея.

В рамках ІІ. і ІІІ. етапы реконштрукції зробило ся дуже много роботы. Зреконштруовали ся фасады на дворі ренесачного каштеля, балкон, комплетно вымінили ся аркады, облакы, ренововали ся історічны двері. Так само на дворі зробила ся травертінова підлога, быв там бетон, зреконштруовала ся студня, але робила ся і каналізація, водовод ці електрика а много далшого.

Вернули автентічну подобу

„Реконштруцкійов подарило ся вернути каштелю автентічну подобу, котра корешпондує з послідньов перебудовов Андрашійовых із кінця 19-го столітя. Його обнова і з приправами тримала майже 15 років. Быв то барз складный процес, котрого резултат, віриме, є імпозантна переміна і головно сохраніня той вызначной народной културной памяткы,“ повів Василь Федіч, директор Вігорлатьского музея в Гуменнім.

ІІ. і ІІІ. етапа реконштрукції надвязала на І. етапу, котра была закінчена іщі у 2016-ім році і ПСК втогды на ню дав 2,6 міліона евр. Обнову фінанцовав з пожычкы Европской інвестічной банкы. Велику реконштрукцію опередили од 2008-го року баданя, засягы до статікы будовы, модернізація технічной інфраштруктуры і великы інтерьєровы роботы.

Цілкова інвестіція до комплетной реконштрукції каштеля так досягла суму 6,5 міліона евр.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА