В календарі гуменьского музею русиньскы памяткы

Рік 2018 быв выголошеный за Европскый рік културной дідовизны. Почас нього одбудуть ся в цілій Европі тісячі різных актівностей і святковань. Приготовлює ся і десять головных европскых ініціатів, вдяка котрым ся має забезпечіти, жебы тот рік мав вплив і по 2018-ім році. Тоты ініціатівы має реалізовати Европска комісія в співпраці із ключовыма партнерами (Радов Европы, UNESCO ітд.).

Із першым своїм вкладом до Европского рока културной дідовизны приходить в тых днях і Вігорлатьскый музей в Гуменнім. На зачатку нового календарьного рока своїх навщівників, партнерів і любителів ословлює настінным календарьом, котрый презентує унікатны артефакты културной дідовизны Вышнього Земпліна, якы находять ся в ареалі сакнзену Вігорлатьского музею.

Двандацять календарьных листів приносить поздоровліня з минулости домова – з дерева, глины, каміня і полотна вытворену унікатну народну господарьску, сакралну архітектуру і архітектуру бываня, інформує Яна Федічова із музею.

„Календарь Сканзен в Гуменнім 2018 є нашым вкладом до сполочных актівностей в рамках проходячого рока 2018 – Европского рока културной дідовизны. Нашым заміром є нелем записовати музейны експонаты, атмосферу минувшых часів, традіцій і припоминати унікатность нами справованых цінностей. Пропонуєме простор про актівный вступ до музейных проєктів ожывленой історії, котра про сучасників і будучі ґенерації вытворює платформу взаємно діленой сполочной културной дідовизны. Довєдна так матеріалізуєме спомины, ожывлюєме технолоґії, даваме освіту молодежі, одкрываме можливости реґіону, спаяме людей і проєктуєме будучность,“ інформує далше Федічова.

Кідьже векшына позбераных експонатів сканзену в Гуменнім походить із русиньскых сел Вышнього Земпліна, в календарі можете найти якостны фотоґрафії деревяной церькви, їй інтерьєру, ці тіпічных про нашы села хыж.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА