В містьскім заряджіню про сеніорів Камяна в Меджілабірцях потвердили новый коронавірус майже у половины кліентів. Позітівно тестованых было і сім із 19-ох робітників заряджіня.
Про аґентуру TASR то у четверь 22-го октобра 2020-го року потвердив директор Камяны Андрій Дрібняк.
Кліенты суть затля без сімптомів
„Маєме 19 позітівно тестованых кліентів і сім робітників, опікункы і єдну здравотну сестру,“ повів Дрібняк з тым, же кліентів, як і робітників на основі резултатів тестів розділили до двох ґруп, причім позітівно тестованы робітници старають ся теперь о позітівно тестованых кліентів.
І кедь суть кліенты, котрых вік є коло 80 років і мають многы діаґнозы, подля директора Камяны суть затля без сімптомів, но боять ся о їх здравотный стан, кедьже мають высокый вік. Натеперь не знав повісти, ці будуть в заряджіню знати выстарчіти з кількостьов робітників, котрых мають теперь.
„Є страх, дакотры можуть одмітнути прийти до роботы. Затля ся таке не стало, но не знаме, што буде далше,“ повів Дрібняк.
Меджілабірці мали довго найменше інфікованых
Окрес Меджілабірці довгый час быв єдным з тых, котры мали найменше хворых на новый тіп коронавірусу. Доста довго собі докінця в першій волні пандемії тримав нулу в рамках інфікованых. Днесь тот найменшый окрес на Словакії, єдночасно найрусиньскішый, належыть на пандемічнім семафорі так само меджі червены окресы.
Одкыль ся взяли хворы і в Камяні директор не знав пояснити. Подля нього то може быти повязане з мобілітов містных жытелів за роботов. „Якбач уж сьме в такій сітуації, же ся то не дасть доглядати,“ повів.
Жрідло фотоґрафії: kamjana.sk.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі