В Климківці рыхтуют ся на купальників

В четвер 15. червця/юнія зачал ся туристичный сезон над озером в Климківці. Дижуры зачали вести порядково-ратунковы службы. На озері появиля ся нова плываюча єдиниця.

Од минулого четверга над штучным резервуаром в Климківці діє Сезоновый Постерунок Поліциі. Мундуровы вєдно з ратівниками з Охотничой Службы Порядку на Воді будут вести дижуры штоденно аж до половины вересня/септембра, значыт до закінчыня сезону. Новістю єст, што безпекы на воді будут пильнувати з патрольовой лодкы.

«Купили сме єй завдякы фінансовій підпорі Воєвідского фундушу Охороны Середовиска і Водной Господаркы в Кракові» – інформує Себастиян Ґлень, пресовый представник Воєвідской Коменды Поліциі в Кракові.

На выпосажыню постерунку сут іщы квад і роверы, што дозваляют патролювати тяжко доступны місця. «Вшытко тото зато, жебы заґарантувати безпеку місцевым та туристам, якы каждого рока чысленно приходят на обшыр озера в Климківці» – додає пресовый представник.

Купелиско на Климківці буде офіцийні одкрыте 1. липця/юлия. «Вызначены будут два місця до купаня. Єдно плытше, для діти і для тых, што ся хотят помочыти, але не мают сил ци знаня плывати, і другє – для любителів клясичного плываня і купаня» – оповідат Здзіслав Нєзґода, шеф Ґмінного Осередка Культуры в Ропі, котрый адмініструє тереном.

До диспозициі одпочываючых є великій паркінґ, за котрый треба буде заплатити. Кошт є такій, як влони – 10 зл од особового авта, 20 зл од автобусів і бусів. Оплата є постійна, незалежна од часу паркуваня.

На місци буде мож наняти ґратя до плываня, як напр. водны роверы. Такы услугы оферуют приватны підприємці, подібні як ґастрономічны услугы.

Фот. malopolska.policja.gov.pl